ޗައިނާގެ ރައީސް ޝީ ޖިންޕިންގެ ދައުވަތަކަށް ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު ރަސްމީ ދަތުރުފުޅެއްގައި ޗައިނާއަށް މިރޭ ފުރާވަޑައިގެންފިއެވެ.
ރައީސް އޮފީހުން ބުނީ، ރައީސްގެ މި ދަތުރުފުޅުގައި ޝީގެ އިތުރުން އެހެން ގައުމުތަކުގެ ލީޑަރުންނާ އެމަނިކުފާނު ބައްދަލުކުރައްވާނެ ކަމަށާއި، އޭގެ އިތުރުން އެސްސީއޯ ސަމިޓުގެ މަތީ ފަންތީގެ ބައްދަލުވުންތަކުގައި އެމަނިކުފާނު ބައިވެރިވެވަޑައިގަންނަވާނެ ކަމަށެވެ.
އެ ބައްދަލުވުންތަކުގައި، މޫސުމަށް އަންނަ ބަދަލުތަކާއި އިސްތިރާޖީ ސަބަބުތަކާހުރެ އިގްތިޞާދުތައް ރޫޅިގެންދާ ދިއުމާއި ޖިއޯޕޮލިޓިކަލް ނުތަނަވަސްކަން ފަދަ މައްސަލަތަކަށް ހައްލު ހޯދުމުގައި ބައިނަލްއަގުވާމީ އެއްބާރުލުމުގެ މުހިންމުކަމުގެ މައްޗަށް އަލިއަޅުއްވާލައްވައި، އެސްސީއޯ ޕްލަސް ބައްދަލުވުމުގައި ރައީސް ބަޔާނެއް އިއްވަވާނެ ކަމަށް ވެސް، ރައީސް އޮފީހުން ބުންޏެވެ.
އެސްސީސޯއަކީ ޔުރޭޝިއާ ސަރަހައްދުގެ ސިޔާސީ، އިގްތިސޯދީ އަދި ދިފާއީ ކަންކަމަށް އަމާޒުކޮށްގެން އެ ސަރަހައްދުގެ ހަ ގައުމަކުން އެކުލަވާލާފައިވާ ސަރަހައްދީ ޖަމިއްޔާއެކެވެ. ދެހާސް އެއްވަނަ އަހަރު އެކުލަވާލި އެ ޖަމިއްޔާ އުފެއްދީ ޗައިނާއާއި ރަޝިޔާއާއި ކަޒަކްސްތާނާއި ކިރިގިސްތާނާއި ތަޖިކިސްތާނާއި އުޒްބެކިސްތާނުންނެވެ.
ޖިއޯގްރަފީއާއި އާބާދީގެ ނިސްބަތުން ދުނިޔޭގެ އެންމެ ބޮޑު ސަރަހައްދީ ޖަމިއްޔާ ކަމަށްވާ އެސްސީއޯގައި 10 މެންބަރު ގައުމެއް ވެއެވެ. އަދި އޮބްޒާވަރުންނާއި ޑައަލޮގް ޕާޓްނަރުންގެ ގޮތުގައި އިތުރު ގައުމުތައް ހަރަކާތްތެރިވާއިރު، ރާއްޖެއަކީ އެސްސީއޯގެ ޑައަލޮގް ޕާޓްނަރެކެވެ.
ފާހަގަކުރެވޭ ގޮތުގައި ރައީސް ޗައިނާއަށް ފުރާވަޑައިގެންފައިވަނީ، އެ ގައުމުގެ ނަސްރުގެ ދުވަސް ނުވަތަ ވީ-ޑޭ ފާހަގަކުރުމަށް ޓަކައި ރަސްމީ ދަތުރުފުޅެއްގައި އެމަނިކުފާނު މި ފެށޭ ސެޕްޓެމްބަރު މަހު ވަޑައިގަންނަވާނެ ކަމަށް، އެ ގައުމުގެ މީޑިއާއަކުން ރިޕޯޓުކޮށްފައި ވަނިކޮށެވެ.