އިންޑިއާގެ މަޝްހޫރު ފިލްމީތަރި ޖެކީ ޝްރޮފް ދާދި ފަހުން ބައިވެރިވި ހަފުލާއެއްގައި ބެލެނިވެރިންނަށް އަމާޒުކޮށް ވަރަށް ވަރުގަދަ މެސެޖެއް ދީފިއެވެ.
މި ފަހަކަށް އައިސް ގިނަ ކުޑަކުދިންނާއި ޒުވާނުން އަދި ބޮޑެތި މީހުން ވެސް ވަނީ ސްކްރީންގެ އަވައިގައި ޖެހިފައި ކަމަށާއި އެކަން ހުއްޓުވުމަށް ކުޑަކުދިންނަށް ގަސް އިންދުމަށް ހިތްވަރު ދިނުމަށް ޖެކީ ވަނީ ގޮވާލާފައެވެ.
އެގޮތުން، ދަރިފުޅަށް ސްކްރީނާ ގުޅުންހުރި ތަކެތި ހަދިޔާގެ ގޮތުގައި ދިނުމުގެ ބަދަލުގައި ގަސް ފަޅާނެ އޮށްތައް ކުދިންނަށް ހަދިޔާ ކުރުމަށް ޖެކީ ވަނީ މައިންބަފައިންނަށް ގޮވާލާފައެވެ.
ފިލްމީ ތަރި ޖެކީ ޝްރޮފް ބޮލީވުޑް ހަފްލާއެއްގައި--ފޮޓޯ/ބޮލީވުޑްހަންގާމާ
ގަސް އިންދާ ހެއްދުމުގެ އާދަ ކުދިންގެ ކިބައިގައި ހަރުލެއްވުމުގެ ސަބަބުން އަންނަން އޮތް ޖީލުތަކަށް އެކަމުގެ ހެޔޮ އަސަރުކުރާނެ ކަމަށް ގަބޫލުކުރެވޭ ކަމަށް ޖެކީ ވަނީ ބުނެފައެވެ.
ގަހެއް އިންދުމަށް ފަހު އެ ގަސް ފަޅާނެ ދުވަހަކަށް ކުދިން އިންތިޒާރުކުރާނެ ކަމަށާއި އެއަށް ފަހު އެ ގަހަކަށް އަޅާލުމާއި ލޯބި ކުދިންގެ ފަރާތުން ލިބި ގަސް ހެދި ބޮޑުވާ މަންޒަރު ފެނުމަކީ އެ ކުދިންނަށް ނުހަނު ބޮޑު އުފަލެއް ލިބޭނެ ކަމެއް ކަމަށް ޖެކީ ވަނީ ސިފަކޮށްފައެވެ.
މި ފަހަކަށް އައިސް އެކިއެކި މުނާސަބާތަކަ ގުޅުވައިގެން ޖެކީ ބައިވެރިވާ ހަފުލާތަކަށް އެކްޓަރު ދަނީ ކޮންމެ ވެސް ކަހަލަ ގަހެއް ހިފައިގެންނެވެ. ފިލްމު އިންޑަސްޓްރީގެ ބައެއް ތަރިން ބާއްވާ އުފަންދުވަހުގެ ޕާޓީތަކާއި ފިލްމު ޕްރީމިއާތަކަށް ވެސް ޖެކީ ދަނީ ހަދިޔާގެ ގޮތުގައި ގަހެއް ދިނުމަށް ކޮންމެ ވެސް ކަހަލަ ގަހެއް ހިފައިގެންނެވެ.
ޖެކީ ގަބޫލުކުރާ ގޮތުގައި އަގުބޮޑެތި ހަދިޔާތަކާއި ތިމާވެއްޓަށް ގެއްލުންހުރި އުފެއްދުންތައް ހަދިޔާގެ ގޮތުގައި ގާތް ފަރާތަކަށް ދިނުމަށްވުރެ ބޮޑަށް ފަހުން ވެސް އެ ހަދިޔާއަކުން ފައިދާއެއް ކުރާނެ އެއްޗެއް ދިނުން މާ ރަނގަޅުވާނެ ކަމަށް އެކްޓަރު ވަނީ ބުނެފައެވެ.