ގައުމުގެ ކުރިއެރުމަށް މަސައްކަތްކުރަންވީ އެންމެން ގުޅިގެން ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
މި އަހަރުގެ ޔުނިޓީ ކަޕް ވޮލީބޯޅަ މުބާރާތުގެ ފައިނަލް މެޗު ޝަރަފުވެރިކޮށްދެއްވާ ވާހަކަދައްކަވަމުން ފައިސަލް ވިދާޅުވީ، ކުޅިވަރުން އުފައްދައިދެނީ އެއްބައިވަންތަކަމާއި އެކުވެރިކަން ކަމަށެވެ. އެކަމުގެ ސަބަބުން ގުޅުން ގުޅުންތައް ބަދަހިވެ، ކުރިއެރުންތައް ހޯދޭ ކަމަށް ފައިސަލް ވިދާޅުވިއެވެ.
އޭނާ ވަނީ ގުޅިގެން މަސައްކަތް ކުރުމުގެ މުހިންމުކަމުގެ މައްޗަށް އަލިއަޅުވާލައްވާފައެވެ.

ވޮލީބޯޅަ މުބާރާތުން އެއްވަނައަށް ދިޔަ ޓީމާ ފައިސަލް ތަށި ހަވާލުކުރަނީ ---
އެހެންވީމާ މިއަދު އަޅުގަނޑުމެންގެ ގައުމުގެ ކަންކަން އޮތް ގޮތުންނާއި މުޅި ދުނިޔޭގެ ކަންކަން ހިނގަމުންދާ ގޮތުން ވެސް އަޅުގަނޑުމެން ގައުމުގެ ކުރިއެރުމަށްޓަކައި އަޅުގަނޑުމެން އެންމެން އެކުގައި ގުޅިގެން މަސައްކަތް ކުރަންވީ،ކުރީގެ ނައިބު ރައީސް ފައިސަލް ނަސީމް
އެކުވެރިކަމާ އެކު މަސައްކަތްކޮށްގެން ނޫނީ ކާމިޔާބު ނުހޯދޭނެކަން ފައިސަލް ފާހަގަކުރެއްވިއެވެ.
ފައިސަލް ވަނީ، ށ. ފުނަދޫގެ ރައްޔިތުންގެ ހިތްހެޔޮކަމާ ގުޅޭ ގޮތުން ވެސް ވާހަކަދައްކަވާފައެވެ. އޭނާ ވިދާޅުވީ، އެ ރަށުގައި ވަރަށް ގިނަ ރަށްރަށުން މީހުން ވަޒަންވެރިވެފައިވާ ކަމަށް މައުލޫމާތު ލިބޭ ކަމަށެވެ.
ހުރިހާ ރައްޔިތުންގެ ފަރާތުން ފެނުނީ ގިނަ ރަށްރަށުން ހިޖުރަ ކުރި މީހުން އުޅުނަސް އެއްވެސް ކަހަލަ ދެކޮޅުވެރިކަމެއް ނެތި އުޅެމުން އަންނަ މަންޒަރު ކަމަށް ފައިސަލް ވިދާޅުވިއެވެ.

ވޮލީބޯޅަ މުބާރާތުގެ ތެރެއިން ---
ހަމައެހެންމެ، އެ ރަށުގެ ކުރިއެރުމަށް ޔުނިޓީ ސްޕޯޓްސް އެކަޑަމީގެ ފަރާތުން ކޮށްދީފައިވާ އިޖުތިމާއީ ކަންކަން ފައިސަލް ވަނީ ފާހަގަކުރައްވާފައެވެ. އެގޮތުން، އެ ރަށުގައި ތަރައްގީކޮށްދީފައިވާ ބީޗާއި ސުކޫލުގައި އެކަޑަމީން ހަދާދީފައިވާ ރީޑިން ޕާކާއި މީހުން ހޭލުންތެރިކުރަން ކުރާ މަސައްކަތް ހިމެނެއެވެ.
އެފަދަ ކަންކަމަކީ ހަމައެކަނި އެންމެ ޖަމިއްޔާއަަކަށް އޮންނަން ޖެހޭނެ ކަމެއް ނޫންކަން ފައިސަލް ފާހަގަކުރެއްވިއެވެ.
އެ ރަސްމިއްޔާތުގައި އުރީދޫގެ ޗީފް ކޮމާޝަލް އޮފިސަރު (ސީސީއޯ) ހުސައިން ނިޔާޒާއި މަޖިލީހުގެ ކަނޑިތީމު ދާއިރާގެ އެމްޑީޕީ މެންބަރު އަމީން ފައިސަލް ވެސް ބައިވެރިވެވަޑައިގެންނެވިއެވެ.