ކުޑައިރު ފެށިގެން އޭނާ އަބަދު ވެސް އުޅޭނީ ކޮންމެ ވެސް ކުޅޭ އެއްޗެއް ރޫޅައިގެން އެއްޗެއް ހަދާށެވެ. ފޮށިގަނޑާއި އެކި އެއްޗެހިންނެވެ. އެކަން ނުކުރާ އިރެއް އޭނާ ހަދާނަކު ނުހުރެއެވެ. އެ ކަމަށް އޭނާގެ ހިތުގައި އޮންނަނީ މާނަ ފުން ލޯތްބެކެވެ. އެ މަސައްކަތުގެ ތެރެއިން ބޮޑުވިއިރު، އޭނާގެ ޝައުގުވެރިކަން އަތުލީ އިންޖިނިއަރިންގެ ދާއިރާއެވެ.
އެ ދާއިރާގެ ތެރެއަށް ހިތް ދޫވިއިރު ވެސް އޭނާ ދެކޭ ހުވަފެނެއް އޮވެއެވެ. އެއީ، އަމިއްލަ ކާރެއް ހެދުމެވެ.
އެ ހުވަފެން އޭނާ ދެކެން ފެށީ ގްރޭޑު އަށެއްގައި ކިޔަވަމުންނެވެ. އެ ކަމުގައި ކުލަ ޖެއްސީ ވެސް އޭނާ އަމިއްލައަށެވެ. އެހާ ތަފާތުކޮށެވެ. މިއީ، އުމުރުން 16 އަހަރުގެ އަހުމަދު އައިޒަން އަމްޖަދު އޭނާގެ ހުވަފެނުގައި ކުލަ ޖައްސަން ކުރި މަސައްކަތެވެ.
ހުވަފެނުގައި ކުލަޖައްސަން ހެދި ކާރު
ކޮންމެ މީހެއްގެ ވެސް އުންމީދުތައް ހުރެއެވެ. އެކަމަކު، އެ އުންމީދުތަކުގައި ކުލަައްސަން ކުރަން ޖެހޭ ކަންކަން ގިނައެވެ. ގިރާ ކުރަން ޖެހޭ އަޑިގުޑަންތައް ވެސް ގިނެވެފައި އުހެވެ. ނަމަވެސް، އެއިން އެއްވެސް ކަމަކާ އައިޒަން ޖެހިލުމެއް ނުވިއެވެ. ކުރިއަށް ދިޔައީ ކުޑައިރު ދުށް ހުވަފެން ކުލަކުރާށެވެ.
އޭނާ ހުރީ ސުކޫލު ދައުރު ސުކޫލު ނިންމާލި ގޮތަށް، އެކަމުގެ މަސައްކަތަށް ފަށަން އަޒުމު ކަނޑައަޅައިގެންނެވެ. އައު ވައްތަރެއްގެ ކާރެއް ތައްޔާރުކުރުމަކީ އޭނާގެ ކުޑައިރުގެ އުންމީދެކެވެ.
އައިޒަންގެ ކާރު: އެ ކާރު އައިޒަން ނިންމާލީ ދެ މަހާއި 10 ދުވަހުން ---- ފޮޓޯ/ ޒުވާން އިންޖިނިއާ
އެ އަޒުމުގައި މިދިޔަ ޖޫން 11 ގައި ގއ. ގެމަނަފުށީ ސުކޫލުން އޯލެވެލް ނިންމި ގޮތަށް ކާރަށް ބޭނުންވާ އެއްޗެހި ހަމަކުރަން ފެށިއެވެ. އެ ތަކެތި ހަމަކޮށްގެން ކާރުގެ އަމަލީ މަސައްކަތްތައް ފެށޭ ވަރުވީ އޭގެ ދެތިން ދުވަސް ފަހުން ޖޫން 16 ގައެވެ.
އޯލެވެލް ނިންމާފައި ބޯހަމަަޖައްސައި މަޖާކޮށްލަން އުޅުމުގެ ބަދަލުގައި އައިޒަން ރެއާ ދުވާލު އުޅުނީ އޭނާގެ ރޭސިން ކާރު ހެދުމުގެ މަސައްކަތުގައެވެ.
"ހެނދުނު 06:00 ޖަހާއިރު ތެދުވެގެން ގޮސް، ދަންވަރު 12:00 ޖަހަން ދެން ހަމަ [ކާރުގެ] މަސައްކަތުގައި އުޅުނީ. ބައެއް ރޭރޭ ނުވެސް ނިދާ މަސައްކަތުގައި އުޅުނީ،" އައިޒަން ކިޔައިދިނެވެ.
އައިޒަން ބުނީ، އޭނާގެ އާއިލާގެ އެއްބާރުލުމާ އެއްކޮށް، ކާރުގެ މަސައްކަތް ކުރީ އޭނާ އަމިއްލައަށް ކަމަށެވެ. އެ މަސައްކަތަށް އެންމެ ބޮޑު އެއްބާރުލުމެއް އޭނާއަށް ދިނީ މަންމައާއި ބައްޕައެވެ.
އަމިއްލައަށް ދަސްކޮށްގެން ކުރަން ޖެހުމުން އައިޒަން ކުރަން ޖެހުނު ތަޖުރިބާ ވެސް ތަފާތުވެފައި، ޚާއްސައެވެ. އޭނާގެ ކާރު ތައްޔާރުކުރަން ދަގަނޑުތައް ވެލްޑަން ކުރަން ދަސްކުރިއެވެ. ކުޑަ ދުވަސްކޮޅެއް ތެރޭ އެކަން ދަސްކޮށް، ކާރުގެ ވެލްޑިން ކުރީ އައިޒަނެވެ.
މި ކާރަކީ އެހެން މީހުން ނުހަދާ ގޮތަކަށް ތައްޔާރުކުރި ކާރަކަށް ވާތީ އޭނާއަށް ތަކެތި ހޯދުމުގައި ގޮންޖެހުންތައް ދިމާވިއެވެ. އެކި ތަންތަނުން އައިޒަން ތަކެތި ހޯދައިގެން ޖެހުނީ ކާރަށް ބޭނުންވާ ގޮތަށް ބަދަލުކުރާށެވެ. ކާރުގައި އައިޒަން ބޭނުންނުކުރީ ބަގީއެއްގެ ފުރޮޅުތަކެކެވެ. ކާރުގެ އެހެން ބައިތަކަށް ބޭނުންވާ ދަގަނޑުތައް ހޯދައިގެން އެބައިތައް ވެސް ކާރަށް 'މޮޑިފައި'ކުރީ ކަމަށް އައިޒަން ބުންޏެވެ. ބޭނުންކުރީ ސައިކަލެއްގެ އިންޖީނެކެވެ. އެ ބައިތައް ހޯދި ނަމަވެސް، ކާރަށް ކުރަން ޖެހުނު ޚަރަދު ވެސް ކުޑައެއް ނޫނެވެ. ލަފާކޮށްލާފައި ޚަރަދުވި ވަރެއް އައިޒަންއަށް ބުނަސް ނޭނގުނަސް، 'ބޮޑު' ޚަރަދެއް ހިނގިކަން އައިޒަން ފާހަގަކުރިއެވެ.
އެތައް ވަގުތެއް ހޭދަކޮށް ކުރި ބުރަ މަސައްކަތުން އޭނާގެ ރޭސިން ކާރު ނިންމާލީ ދެ މަހާއި 10 ދުވަހުންނެވެ.
ރޭސިން ކާރު ހެދިއިރު، ވިލްޑަންކޮށްގެން ކާރުގެ ދަގަނޑުތައް ގުޅުވާފައި --- ފޮޓޯ/ ޒުވާން އިންޖިނިއާ
އޭގެ ކުރިން އޭނާ އޮތީ ރަށު ތެރޭގައި ޓެސްޓަކަށް ކާރު ދުއްވުމުގެ ހުއްދައަށް ފުލުހުން ކިބައިން އެދިފައެވެ. އެކަމަށް ލިބުނު ހުއްދައާ އެކު، މިދިޔަ ބުދަ ދުވަހު ގެމެނަފުށީގެ މަގުތަކުގައި އައިޒަން ވަނީ އޭނާގެ ރޭސިން ކާރު ދުއްވާފައެވެ. އެ ކާރު ފެނުމާ އެކު، ރަށުގެ އެންމެންގެ ވެސް ތިބީ އައިޒަންގެ އެ ހުނަރުވެރިކަން ފެނި އަޖައިބުވެފައެވެ.
"ރަށު މީހުން ވަރަށް އަޖައިބުވެފައި ތިބީ، ނުފެންނަ އެއްޗެއް ފެނުނީމާ. ވަރަށް ހިތްހަމަޖެހުނު މި މަސައްކަތާ ދޭތެރޭ. ވަރަށް ދުވަސްވީ އިންތިޒާރެއް ދޯ. ސުކޫލު ދައުރުގެ ގްރޭޑު އަށަކުން ފަށައިގެން ޚިޔާލު ކުރަމުން އައި ކަމެއް މިއީ،" ހުވަފެން ހާސިލުކުރުމުގެ އުފަލާ އެކު އޭނާ ކިޔައިދިނެވެ.
އެހާ ދުވަހުގެ ބުރަ މަސައްކަތުން ވިޔަސް އުންމީދުގައި ކުލަޖެހުނީތީ އައިޒަން ހުރީ އުފަލުން ފޮޅިފައެވެ. އެ އުފަލުގައި އޭނާ މިހާރު ހުރީ އިންޖިނިއަރިން ދާއިރާއިން ސެޓްފިކެޓް ލެވެލް ހަތަރެއްގެ ކޯހެއް ހަދަން މާލޭގައެވެ. މިހާރު އޭނާގެ ކާރު އޮތީ ގޭގެ ގަރާޖުގައެވެ.
އައިޒަން ސާބިތުކޮށްދިނީ ހުވަފެންތަކުގައި ކުލަޖެއްސޭނެކަމެވެ. އެ ކަމަށް ބޭނުންވަނީ ކުޑަ ހިތްވަރަކާއި އަޒުމެވެ. ހުނަރު ދަސްކޮށްގެން، އަމިއްލައަށް އެއްޗެހި ހަމަކޮށްގެން ހެދި ރޭސިން ކާރުން އައިޒަން ކުލަ ޖެއްސީ ކުޑައިރުގެ ހުވަފެނުގައެވެ.