ބައެއް ނޫސްވެރިންވީ 'އުލުބައިންދަން' ކަމަށް ސަރުކާރު ހިންގާ ޕީއެންސީގެ ޕާލިމަންޓްރީ ގްރޫޕު (ޕީޖީ)ގެ ލީޑަރު އިބްރާހިމް ފަލާހް ގޮވާލެއްވި މައްސަލަ ތަހުގީގުކުރުމަށް ޓަކައި ގާނޫނީ ލަފާ ހޯދަމުން އަންނަ ކަމަށް ދިވެހި ފުލުހުން މިއަދު ބުނެފިއެވެ.
މީޑިއާ ކޮންޓްރޯލްކުރާ ބިލަށް ބަހުސްކުރައްވަމުން ފަލާހް ވަނީ 'ނޫސްވެރިން އުލުބައިންދަންވީ' [އަނިޔާވެރި ގޮތުގައި މަރުގެ އަދަބު ދޭންޖެހޭ] ކަމަށް ވިދާޅުވެފައެވެ.
އެ މައްސަލަ ވަނީ ފުލުހަށް ވެސް ނޫސްވެރިންގެ ޖަމިއްޔާ (އެމްޖޭއޭ)ގެ ފަރާތުން ހުށަހަޅާފައެވެ.
އެއާއެކު މި ކަމާ ގުޅޭގޮތުން މިއަދު ފުލުހުން ބުނީ ފަލާހު، މަޖިލީހުގެ ތަޅުމުގައި ދައްކަވައިފައިވާ ވާހަކައަކާ ގުޅިގެން އެމްޖޭއޭއިން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދި، އިއްޔެ ޕްރޮސެކިއުޓާ ޖެނެރަލްގެ އޮފީހަށް ހުށަހަޅައިފައިވާ ކަމަށެވެ.
ނޫސްވެރިންނަށް މަރުގެ އަދަބު ދޭން ފަލާހު ގޮވައިލެއްވި މައްސަލަ ވަރަށް ބޮޑަށް ވަނީ ހޫނުވެފައެވެ.
އެގޮތުން އިއްޔެ ވެސް ނޫސްވެރިން ވަނީ 'މީޑިއާ ކޮންޓްރޯލް' ބިލާ ގުޅިގެން އިހުތިޖާޖުކުރަން ރައީސް އޮފީސް ސަރަހައްދަށް އެއްވެފައެވެ.
އެ އިހުތިޖާޖުގެ ކުރިއަށްދަނިކޮށް، އޮފީސް ނިންމަވައި ރައީސް ގެކޮޅަށް ވަޑައިގަންނަވަން ރައީސް އޮފީހުން ނިކުމެވަޑައިގެންނެވި ވަގުތު ނޫސްވެރިން ވަނީ ރައީސް ގެކޮޅަށް ވަދެވަޑައިގަންނަވަންދެން ސުވާލުކުރަމުން ފަހަތުން ގޮސްފައެވެ.
ފަލާހު ދެއްކެވި ވާހަކަތަކާ ގުޅިގެން ތަކުރާރުކޮށް އެތައް ނޫސްވެރިންނެއް ސުވާލުކުރުމުން ރައީސް ވިދާޅުވީ، 'އަޅުގަނޑު އެކަން ބަލާނަން' ކަމަށެވެ.
އިތުރު އެއްޗެއް ވިދާޅެއް ނުވެއެވެ. ފާހަގަކޮށްލެވޭ ގޮތުގައި އިއްޔެ ނޫސްވެރިންގެ ޖަމިއްޔާގެ މެންބަރުންނާ ރައީސް ބައްދަލުކުރެއްވިއިރު ވެސް ފަލާހް ދެއްކެވީ 'ވަރަށް ދެރަވަރު' ވާހަކަފުޅެއް ކަމަށް ރައީސް ވިދާޅުވި ކަމަށް ބައްދަލުވުމުގައި ބައިވެރިވި ނޫސްވެރިން ވަނީ ބުނެފައެވެ.
ނޫސްވެރިންގެ ޖަމިއްޔާއިން ވަނީ އެ މައްސަލަ ފުލުހަށް ވެސް ހުށަހަޅާފައެވެ. އެ ޖަމިއްޔާއިންވަނީ ފަލާހްގެ މައްސަލަ ތަހުގީގުކޮށް، ފިޔަވަޅު އަޅައިދޭން އެދިފައެވެ.