"އުލު ބެއިންދުން" ބޭނުންކުރަނީ ބަސްނާހާ މީހުން ބިމަށް ވުރެ މަތީ ތަނަކަށް އެރުވުމަށް ކަމަށް ވިދާޅުވެ، ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ޕީއެންސީ ޕާލަމެންޓަރީ ގްރޫޕްގެ ލީޑަރު އިބްރާހީމް ފަލާހު، އޭނާ ދެއްކެވި ވާހަކަ ދިފާއުކުރައްވައިފިއެވެ.
މިދިޔަ ބުދަ ދުވަހު ދައުރުން ބޭރުން ބޭއްވި ރައްޔިތުންގެ މަޖިލީހުގެ ޖަލްސާގައި, މީޑިއާ ކޮންޓްރޯލްކުރާ ބިލަށް ބަހުސްކުރައްވަމުން އިނގުރައިދޫ ދާއިރާގެ މެންބަރު ފަލާހު ވިދާޅުވީ، ނޫސްވެރިން "އުލު ބައިންދަންވީ" ކަމަށެވެ.
ރަދީފުގައިވާ މާނައަށް ބެލުމުން ދޭހަވަނީ އަނިޔާވެރިގޮތުގައި މަރުގެ އަދަބުދޭން ޖެހޭ ކަމަށެވެ. ފަލާހު އެހެން ވިދާޅުވި މައްސަލަ، ނޫސްވެރިންގެ ޖަމިއްޔާ އެމްޖޭއޭއިން ވަނީ ފުލުހަށް އިއްޔެ ހުށަހަޅައިފައެވެ.
އެއާއެކު މި ކަމާ ގުޅޭގޮތުން މިއަދު ފުލުހުން ބުނީ ފަލާހު، މަޖިލީހުގެ ތަޅުމުގައި ދައްކަވައިފައިވާ ވާހަކައަކާ ގުޅިގެން އެމްޖޭއޭއިން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދި، އިއްޔެ ޕްރޮސެކިއުޓާ ޖެނެރަލްގެ އޮފީހަށް ހުށަހަޅައިފައިވާ ކަމަށެވެ.
އެހެންވެ، "ސަން"އިން ލިޔެފައިވާ ޚަބަރުގައި ސްކްރީންޝޮޓެއް ނަންގަވައި "އެކްސް"ގައި ފަލާހު ލިޔުއްވާފައިވާ ގޮތުގައި، މި މައްސަލައިގައި އޭނާ ޖަލަށް ލައިފިނަމަ، ކުޑަގޮޅީގެ ރަހުމަތްތެރިންނަށް ވާނީ އެމްޑީޕީގެ ވެރިކަންކުރާ ރައީސުންނާއި އެ ޕާޓީގެ މަޖިލީހުގެ މެންބަރުންނާއި ނޫސްވެރިންނެވެ.
ސަބަބަކީ، އޭނާ ލިޔުއްވާފައިވާ ގޮތުގައި، އެއަށް ވުރެ ގިނައިން އިސްލާމްދީނުގެ އަސްލުތަކާ ޚިލާފުވެ، އިސްލާމްދީން ނޫން ދީންތައް ރާއްޖެ ގެންނަން ވަކާލާތުކުރި ދެވަނަ ބަޔަކު އެ ނޫނިއްޔާ، މި ގައުމަކު ނޫޅޭނެއެވެ.
"އަޅުގަނޑު ނޯންނާނެ މީހަކު މަރަން ބުނެފައެއް، އުލު ބޭންދުން އަޅުގަނޑުމެން ހިސާބުގައި ބޭނުންކުރަނީ ބަސްނާހާ މީހުން ބިމަށްވުރެ މަތީ ތާކަށް އެރުވުމަށް،" ފަލާހުގެ ޕޯސްޓުގައި ވެއެވެ.
ނޫސްވެރިންނަށް މަރުގެ އަދަބު ދޭން ފަލާހު ގޮވައިލެއްވި މައްސަލަ ވަރަށް ބޮޑަށް ވަނީ ހޫނުވެފައެވެ.
އެގޮތުން އިއްޔެ ވެސް ނޫސްވެރިން ވަނީ 'މީޑިއާ ކޮންޓްރޯލް' ބިލާ ގުޅިގެން އިހުތިޖާޖުކުރަން ރައީސް އޮފީސް ސަރަހައްދަށް އެއްވެފައެވެ.
އެ އިހުތިޖާޖުގެ ކުރިއަށްދަނިކޮށް، އޮފީސް ނިންމަވައި ރައީސް ގެކޮޅަށް ވަޑައިގަންނަވަން ރައީސް އޮފީހުން ނިކުމެވަޑައިގެންނެވި ވަގުތު ނޫސްވެރިން ވަނީ ރައީސް ގެކޮޅަށް ވަދެވަޑައިގަންނަވަންދެން ސުވާލުކުރަމުން ފަހަތުން ގޮސްފައެވެ.
ފަލާހު ދެއްކެވި ވާހަކަތަކާ ގުޅިގެން ތަކުރާރުކޮށް އެތައް ނޫސްވެރިންނެއް ސުވާލުކުރުމުން ރައީސް ވިދާޅުވީ، 'އަޅުގަނޑު އެކަން ބަލާނަން' ކަމަށެވެ.
އިތުރު އެއްޗެއް ވިދާޅެއް ނުވެއެވެ. ފާހަގަކޮށްލެވޭ ގޮތުގައި އިއްޔެ ނޫސްވެރިންގެ ޖަމިއްޔާގެ މެންބަރުންނާ ރައީސް ބައްދަލުކުރެއްވިއިރު ވެސް ފަލާހް ދެއްކެވީ 'ވަރަށް ދެރަވަރު' ވާހަކަފުޅެއް ކަމަށް ރައީސް ވިދާޅުވި ކަމަށް ބައްދަލުވުމުގައި ބައިވެރިވި ނޫސްވެރިން ވަނީ ބުނެފައެވެ.