ޕްރިންޓު ނުކުރެވި، އީ-ޕާސްޕޯޓު ދޫކުރުން މެދުކަނޑާލައިފި

ދިވެހި ޕާސްޕޯޓު -- ފޮޓޯ/ ރާއްޖެ އެމްވީ

ދިވެހިރާއްޖޭގެ އޯޑިނަރީ އިލެކްޓްރޯނިކް ޕާސްޕޯޓު ޕްރިންޓްކުރާ ބުކްލެޓް ސްޓޮކް ލިބުމުގައި ލަސްތަކެއް ދިމާވުމުން، މޯލްޑިވްސް އިމިގްރޭޝަނުން އީ-ޕާސްޕޯޓު ދޫކުރުން ވަގުތީގޮތުން ހުއްޓާލައިފިއެވެ. މީގެ ބަދަލުގައި ދޫކުރާނީ ފަސް އަހަރުގެ މުއްދަތަށް އައިކާއޯ މިންގަނޑަށް ފެތޭ ނޮން-އިލެކްޓްރޯނިކް ޕާސްޕޯޓެކެވެ. މިއާއެކު ޕާސްޕޯޓު ފީ ވަނީ 1000 ރުފިޔާއިން 600 ރުފިޔާއަށް ކުޑަކޮށްފައެވެ. އަދި ފަހުން ކެންސަލޭޝަން ފީއަކާ ނުލައި އީ-ޕާސްޕޯޓަށް ބަދަލުކުރެވޭނެ އިންތިޒާމު ވަނީ ހަމަޖައްސާފައެވެ.

  • އީ-ޕާސްޕޯޓު ދޫކުރުން ވަގުތީގޮތުން ހުއްޓާލައިފި
  • ބަދަލުގައި ދޫކުރާނީ 600 ރުފިޔާގެ ނޮން-އިލެކްޓްރޯނިކް ޕާސްޕޯޓު
  • ކެންސަލޭޝަން ފީއަކާ ނުލައި ފަހުން އީ-ޕާސްޕޯޓަށް ބަދަލުކުރެވޭނެ
  • މިއީ ބުކްލެޓް ސްޓޮކް ލިބެންދެން އެޅި ވަގުތީ ފިޔަވަޅެއް

ދިވެހި "އޯޑިނަރީ އިލެކްޓްރޯނިކް ޕާސްޕޯޓު" ޕްރިންޓް ކުރުމަށް ބޭނުންކުރާ ބުކްލެޓްގެ ސްޓޮކް ރާއްޖެއަށް ގެނައުމުގައި ލަސްތަކެއް ދިމާވުމާ ގުޅިގެން، އީ-ޕާސްޕޯޓު ދޫކުރުން ވަގުތީ ގޮތުން މެދުކަނޑާލައިފިއެވެ.

މޯލްޑިވްސް އިމިގްރޭޝަނުން ހާމަކުރި ގޮތުގައި، މާދަމާއިން ފެށިގެން އޯޑިނަރީ ޕާސްޕޯޓަށް އެދި ހުށަހަޅާ ފަރާތްތަކަށް ދޫކުރާނީ "ނޮން-އިލެކްޓްރޯނިކް ޕާސްޕޯޓު" އެވެ.

މި ފިޔަވަޅަކީ އިލެކްޓްރޯނިކް ޕާސްޕޯޓުގެ ސްޓޮކް މެނޭޖްކުރުމުގެ ބޭނުމުގައި އެޅި ފިޔަވަޅެއް ކަމަށް އިމިގްރޭޝަނުން ބުންޏެވެ. ނޮން-އިލެކްޓްރޯނިކް ޕާސްޕޯޓަކީ ވެސް އިންޓަނޭޝަނަލް ސިވިލް އޭވިއޭޝަން އޮތޯރިޓީ (އައިކާއޯ) ގެ މިންގަނޑުތަކާ އެއްގޮތަށް ތައްޔާރުކޮށްފައިވާ، ފަސް އަހަރު ދުވަހުގެ މުއްދަތަށް ދޫކުރެވޭ މެޝިން ރީޑަބަލް ޕާސްޕޯޓެކެވެ.

ޕާސްޕޯޓުގެ ބާވަތަށް އައި ބަދަލާއެކު، ޚިދުމަތުގެ އަގަށް ވެސް ވަނީ ބަދަލުތަކެއް އައިސްފައެވެ. އާންމުކޮށް އޯޑިނަރީ އިލެކްޓްރޯނިކް ޕާސްޕޯޓެއްގެ ފީއަކީ 1,000 ރުފިޔާ ނަމަވެސް، މިހާރު ދޫކުރަން ނިންމާފައިވާ ނޮން-އިލެކްޓްރޯނިކް ޕާސްޕޯޓުގެ ފީއަކީ 600 ރުފިޔާއެވެ. މިއީ އިލެކްޓްރޯނިކް ޕާސްޕޯޓަށްވުރެ 400 ރުފިޔާގެ އަގު ހެޔޮ އަދަދެކެވެ.

މީގެ އިތުރުން، ނޮން-އިލެކްޓްރޯނިކް ޕާސްޕޯޓު ހަދާ ފަރާތްތަކަށް އިމިގްރޭޝަނުން ވަނީ ޚާއްސަ ލުޔެއް ދިނުމަށް ނިންމާފައެވެ. އެގޮތުން، ޕާސްޕޯޓުގެ މުއްދަތު ހަމަވުމުގެ ކުރިން އިލެކްޓްރޯނިކް ޕާސްޕޯޓެއް ހައްދަން ބޭނުންވާ ހާލަތްތަކުގައި، މީގެ ކުރިން އަމަލުކުރާ އުސޫލާ ޚިލާފަށް، "ކެންސަލޭޝަން ފީ" އެއް ނެގުމަކާ ނުލައި ޕާސްޕޯޓު ހެއްދޭނެ އިންތިޒާމު ހަމަޖައްސައިދޭނެ ކަމަށް އެ އިދާރާއިން މައުލޫމާތު ދެއެވެ.

މި ބަދަލާ ގުޅިގެން ޚިދުމަތް ހޯއްދަވާ ފަރާތްތަކަށް ދިމާވެދާނެ ދަތިތަކަށް އިމިގްރޭޝަނުން ވަނީ މައާފަށް އެދިފައެވެ.

މި ނިންމުމަކީ ސްޓޮކްގެ ދަތިކަން ހައްލުވަންދެން ވަގުތީ ގޮތުން އަމަލުކުރެވޭނެ އުސޫލެއް ކަމަށް ބެލެވެއެވެ.

comment ކޮމެންޓް