ބޮލީވުޑްގެ މަޝްހޫރު ބަތަލާ ސޯނަމް ކަޕޫރާއި ފިރިމީހާ އާނަންދު އަހޫޖާ ދާދިފަހުން ލަންޑަނުން ގަތް އެޕާޓްމަންޓްތަކަކާ ގުޅިގެން އެ ހިސާބުގައި ދިރިއުޅޭ އަވަށްޓެރިންގެ މެދުގައި ހިތްހަމަނުޖެހުން އުފެދިފައިވާ ކަމަށް ރިޕޯޓުތަކުން ބުނެފިއެވެ.
ނޮޓިންގް ހިލްގައި މި ދެމަފިރިން ދިރިއުޅޭ ގޭގެ ކައިރިން އިތުރު އެޕާޓްމަންޓްތަކެއް ގަތުމާއި، އެ ތަންތަން ގޭގެ މުވައްޒަފުން ބޭތިއްބުމަށް ބޭނުންކޮށްފާނެ ކަމުގެ ކަންބޮޑުވުން އެ ސަރަހައްދުގެ ރަށްވެހިން ވަނީ ފާޅުކޮށްފައެވެ.
ރިޕޯޓްތައް ބުނާ ގޮތުގައި، މި ދެމަފިރިން ވަނީ "ހިލް ކްރެސްޓް" ނަމަކަށް ކިޔާ އިމާރާތަކުން ފަސް އެޕާޓްމަންޓް ގަނެފައެވެ. މިއީ މީގެ ތިން އަހަރު ކުރިން އެ ދެމަފިރިން ދިރިއުޅެން އަގުބޮޑުކޮށް ގަނެފައިވާ ލަގްޒަރީ ގެއާ މާ ދުރު ނޫން ހިސާބެއްގައި ހުރި ތަންތަނެވެ.
ސޯނަމް އާއި އާނަންދު ދެ ކުދިންނާ އެކު--ފޮޓޯ/އިންޑިއަންއެކްސްޕްެސް
ނަމަވެސް، މި އެޕާޓްމަންޓްތައް ގަތުމުން އެ ސަރަހައްދުގެ ބައެއް ރަށްވެހިން ތިބީ ވަރަށް ބޮޑަށް ހިތްހަމަނުޖެހިފައެވެ. އަވަށްޓެރިން ކަންބޮޑުވަނީ މި އެޕާޓްމަންޓްތަކަކީ އާނަންދު އާއި ސޯނަމްގެ ދިރިއުޅޭ ގޭގައި މަސައްކަތްކުރާ މުވައްޒަފުން ބޭތިއްބުމަށް ބޭނުންކުރާނެ ތަންތަން ކަމަށް ބެލެވޭތީއެވެ.
"ޑެއިލީ މެއިލް"އިން ރިޕޯޓްކޮށްފައިވާ ގޮތުގައި، މި ދެމަފިރިންނާ ގުޅުންހުރި ކުންފުންޏަކުން މި ފަސް އެޕާޓްމަންޓް ގަނެފައި ވަނީ ގާތްގަނޑަކަށް 51 ކްރޯޑް ރުޕީސްއަށެވެ.
އެ ސަރަހައްދުގެ މީހުން ބުނާ ގޮތުގައި، މިފަދަ ބަދަލުތަކުގެ ސަބަބުން އެ ތަނުގެ އާންމު ދިރިއުޅުމުގެ ފެންވަރާއި އާދަކާދަތަކަށް ބަދަލުތަކެއް އައިސް، މިހާތަނަށް އެ ސަރަހައްދުގައި ދިރިއުޅޭ އަވަށްޓެރިންގެ މެދުގައި އޮތް ގާތް ރަހުމަތްތެރި މާހައުލަށް ނޭދެވޭ އަސަރުކޮށްފާނެއެވެ.
ބައެއް ރަށްވެހިން ފާހަގަކުރި ގޮތުގައި، ނުފޫޒުގަދަ އަދި މުއްސަނދި ވެރިންނާ ދެކޮޅަށް ފާޅުގައި ވާހަކަދައްކަން އެމީހުން ޖެހިލުންވެއެވެ. އަދި ބައެއް މީހުން ތިބީ މުއްސަނދިންގެ ސަބަބުން އަވަށްޓެރިންނަށް ކުރިމަތިވާ އުނދަގޫތަކާ މެދު ވަރަށް ބޮޑަށް މާޔޫސްވެފައެވެ.
ސޯނަމް އާއި އާނަންދު ލަންޑަންގައި--ފޮޓޯ/އިންޑިއަންއެކްސްޕްރެސް
މީގެ އިތުރުން، މެދުނުކެނޑި ކުރިއަށްދާ މަރާމާތުގެ މަސައްކަތްތަކާއި، ފަޅަށް ހުންނަ އެޕާޓްމަންޓްތަކުގެ ސަބަބުން ލިބޭ އުނދަގޫތަކުގެ ޝަކުވާ ވެސް ވަނީ ފެންމަތިވެފައެވެ.
މި މައްސަލައިގައި އިނގިރޭސި މީޑިއާތަކާއި ސޯޝަލް މީޑިއާގައި ބޮޑު ބަހުސެއް ހިނގަމުންދިޔަ ނަމަވެސް، މިކަމާ ގުޅޭގޮތުން މިހާތަނަށް ސޯނަމް އާއި އާނަންދު ވެސް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
ބޮލީވުޑްގެ އިތުރުން ފެޝަންގެ ދުނިޔޭގައި ވެސް ނަން މަޝްހޫރު ބަތަލާ ސޯނަމް މިހާރު ގިނަ ވަގުތު ހޭދަކުރަނީ އިންޑިއާ އާއި ލަންޑަނުގައެވެ.
ސޯނަމްގެ ފިރިމީހާ އާނަންދު އަހޫޖާއަކީ އިންޑިއާގެ ބޮޑު ކުންފުންޏެއް ކަމަށްވާ "ޝާހީ އެކްސްޕޯޓްސް"ގެ ވާރިސެވެ. މީގެ އިތުރުން އޭނާއަކީ "ބާނޭ" އަދި "ވެޖް ނޮން ވެޖް" ފަދަ ފެޝަން ބްރޭންޑްތަކާ ގުޅުންހުރި ކާމިޔާބު ވިޔަފާރިވެރިއެކެވެ.
ދާދިފަހުން ދެވަނަ ދަރިފުޅު ލިބިފައިވާ ބަތަލާ ވަނީ ކައިވެންޏަށްފަހު ފިލްމީ މަސައްކަތްތަކުން ބޮޑު ބްރޭކެއް ނަގާފައެވެ.