މި މަހުގެ 20 ވަނަ ދުވަހު ނެޓްފްލިކްސްއިން ޕްރީމިއާ ކުރި ރިއަލިޓީ ޝޯ "ދޭސީ ބްލިންގް" އަކީ ދުބާއީގައި ދިރިއުޅޭ މުއްސަނދި އިންޑިއާ މީހުންގެ މުޖުތަމައުގެ ތެރޭގައި ހިނގާ ކަންކަން ދައްކުވައިދޭ ޝޯއެކެވެ.
މި ޝޯގައި ދައްކުވައިދެނީ ދުބާއީގައި ދިރިއުޅޭ އިންޑިއާއަށް ނިސްބަތްވާ މަހުޖަނުންތަކެއްގެ ދިރިއުޅުމުގެ މުއްސަނދިކަމާއި އެކު ކެމެރާގެ ކުރިމަތީގައި އެކަކު އަނެކަކަށް ބަދަލުކުރާ ހޫނު ބަހުސްތަކެވެ.
އަގުބޮޑު ފޭރާމާއި ގަހަނާތަކުގެ ފުރަގަހުން ހާމަވާ އެކަނިވެރި ގުޅުންތަކާއި، ވިސްނުންތަކާއި، އަދި ވަރަށް ބޮޑު ރޭވުންތެރިކަމަކާ އެކު ޝޯގެ ބައިވެރިން ބެލުންތެރިންނަށް ދައްކާ އިހުސާސްތައް މި ސިލްސިލާއިން ދައްކުވައިދެއެވެ.
މި ޝޯ ބަލަމުންދިޔައިރު ޝޯގެ އެޕިސޯޑެއްގެ މެދުތެރެއިން ހުއްޓާލާފައި، އަމިއްލަ ބޭންކު އެކައުންޓް ޗެކްކޮށް، "އަހަރެން މިހާ ދުވަހު މިއުޅުނީ ފަގީރުކަމުގައި ބާވައޭ" ހިތަށް އެރި ކަމަށް "ދޭސީ ބްލިންގް" ބެލި މީހަކު ސޯޝަލް މީޑިއާގައި ބުނެފައިވެއެވެ.
އިންޑިއާގެ ޓެލެވިޒަން ތަރިން ކަމަށްވާ ކަރަން ކުންދްރާ އަދި ތެޖަސްވީ ޕްރަކާޝް--ފޮޓޯ/އިންޑިއާޓުޑޭ
އެމީހުންނަށް "ލަގްޒަރީ" އަކީ ހަމައެކަނި ދިރިއުޅުމުގެ ވައްޓަފާޅިއެއް ނޫނެވެ. އެއީ އެމީހުން ދެކޭގޮތުގައި އެމީހުންގެ ޝަހުސިއްޔަތުގެ ބައެކެވެ. އާދައިގެ މީހުން ކާބޯތަކެތީގެ ވާހަކަ ދައްކާ ފަދައިން، މި މީހުން ވާހަކަދައްކަނީ ރަނާއި އަގުބޮޑު ކާރުތަކުގެ ވާހަކަ ކަމަށް ރެޑިފްގެ ރިވިއުއެއްގައި ލިޔެފައިވެއެވެ.
މި ޝޯ ފެށެނީ ސަތީޝް އަދި ތަބިންދާ ސަންޕާލްގެ ވާހަކައިންނެވެ. ތަބިންދާ ބުނާ ގޮތުގައި އޭނާގެ އަތުގައި 40 ކިލޯގެ ރަން އެބަހުއްޓެވެ.
އަދި އެމީހުންގެ ދަރިފުޅުގެ ފުރަތަމަ އުފަންދުވަހުގެ ހަފްލާގައި ތުއްތު ކުއްޖާ ލައިގެން ހުރީ 24 ކެރަޓްގެ ރަނުން ޒީނަތްތެރިކޮށްފައިވާ ހެދުމެއް ކަމަށް ބުނެފައިވެއެވެ. މިއީ އާދައިގެ މީހެއްގެ ސިކުނޑިއަށް ގަބޫލުކުރަން ދަތި މިންވަރެކެވެ.
މުޅި ޝޯގައި ދައްކުވައިދެނީ މި ކަހަލަ ކަންތައްތަކެވެ. ވަފާތެރިކަމާއި، ނުތަނަވަސްކަމާއި، އަދި ކައިވެނީގެ މައްސަލަތައް ހައްލުކުރަން އިތުރު ކުއްޖަކު ހޯދުމުގެ ވާހަކަތައް ބައިވެރިންގެ މެދުގައި ދެކެވޭއިރު މިއީ ކިތަންމެ ރަނަކުން ވެސް ފޮރުވޭނެ ކަންކަމެއް ނޫންކަން ހާމަކޮށްދެއެވެ. އަދި ބައެއް އަންހެނުން އެމީހުންގެ ފިރިންގެ ބޭވަފާތެރިކަމަށް ކެތްކޮށްގެން ތިބެނީ، އެ ލިބޭ މުއްސަނދި ދިރިއުޅުން ދޫކޮށްލަން ބޭނުން ނުވާތީކަން ވެސް ހާމަވެއެވެ.
އިންޑިއާއަށް ނިސްބަތްވާ ދުބާއީގެ ބިލިއަނަރު ސަތީޝް އޭނާގެ އަންހެނުން ތަބީނާއާ އެކު--ފޮޓޯ/އިންޑިއަންއެކްސްޕްރެސް
ޝޯގެ އެންމެ ބޮޑު ސަމާލުކަމެއް ލިބުނު ބައިވެރިންނަކީ އިންޑިއާގެ މަގުބޫލު ޓެލެވިޒަން ތަރިން ކަމަށްވާ ކަރަން ކުންދްރާ އާއި ތޭޖަސްވީ ޕްރަކާޝްއަށެވެ. އެމީހުންގެ ލޯބީގެ ވާހަކަ ސޯޝަލް މީޑިއާގައި މަޝްހޫރުވެފައިވާއިރު، މި ޝޯއިން އެކަމުގެ ފައިދާ ވަރަށް ބޮޑަށް ނަގައެވެ.
ދާދިފަހުން ދުބާއީއަށް ދިރިއުޅުން ބަދަލުކުރި މި ދެ ބައިވެރިންނާ އެކު ޝޯގެ ނިމުމުގައި ކަރަން، ތޭޖަސްވީއަށް ކައިވެންޏަށް ހުށަހަޅާ މަންޒަރު ދައްކައިދެއެވެ. ނަމަވެސް މި މަންޒަރު ދައްކުވައިދީފައި ވަނީ، ވަރަށް ބޮޑަށް ރޭވިގެން، ހަމައެކަނި ޝޯއަށް ޓަކައި ކޮށްފައިވާ ކަމެއްގެ ގޮތުގައެވެ.
"ދޭސީ ބްލިންގް"ގައި ފެންނަ ކޮންމެ އަސަރުގަދަ ވަގުތެއް ވެސް ހީވަނީ ފިލްމު ކުރުމުގެ ކުރިން އެންމެން ރިހާސަލް ހަދާފައި ތިބި މަންޒަރުތަކެއްގެ ގޮތުގައި ވެސް ބައެއް މީހުން ވަނީ ސިފަކޮށްފައެވެ.
މި ޝޯގެ ބައިވެރިންނަކީ ހަރުދަނާ ބޮޑެތި މީހުން ފަދައިން މުއާމަލާތްކުރާ ބައެއް ނޫންކަމަށާއި، އެމީހުން މުއާމަލާތް ކުރަނީ ކުއްލިއަކަށް މުއްސަނދިކަން ލިބުނު އަންހެނުންތަކެއް ފަދައިން ކަމަށް ބައެއް ބެލުންތެރިން ވަނީ ސިފަކޮށްފައެވެ.
ކޮންމެ މީހަކު ވެސް އަނެކާގެ ފުރަގަހުގައި ދޭތެރެޖެއްސުމުގެ ގޮތުން ވާހަކަތައް ދައްކައި ކޮންމެ އެޕިސޯޑެއްގައި ބައިވެރިންގެ މެދުގައި އޮންނަ އެކުވެރިކަން ރޫޅާލައެވެ. އަދި ކުރިމަތިލުންތައް ހިނގަނީ އިންޑިއާގެ ޑްރާމާ ސިލްސިލާތަކުގެ ފެންވަރުގައި ކަމަށް ރެޑިފްގައި މި ޝޯ ރިވިއުކުރި ގިނަބަޔަކު ވަނީ ބުނެފައެވެ.
އެހެންނަމަވެސް، "ދޭސީ ބްލިންގް"ގައި ހަމައެކަނި ފެންނަނީ މުއްސަނދިކަމާއި ދެއްކުންތެރިކަމެއް ނޫން ކަމަށާއި، ބައެއް އަސަރުގަދަ ވާހަކަތައް ވެސް ހިމެނޭ ކަމަށް ބައެއް ބެލުންތެރިން ވަނީ އެއްބަސްވެފައެވެ.
އޭގެތެރޭގައި ޝޯގެ ބައިވެރިއަކަށް ކެންސަރު ބަލިޖެހުނު ވާހަކަ ދެއްކުމަކީ، މި ހުރިހާ ދެއްކުންތެރިކަމެއްގެ ތެރެއިން ފެނުނު ހަގީގީ އެއް މަންޒަރު ކަމަށް އެއް ބަޔަކު ވަނީ ބުނެފައެވެ.
ހަމައެފަދައިން، ޝޯގެ އެންމެ ޒުވާން ދެ ބައިވެރިންގެތެރޭ ހިމެނޭ، ލައިލީ އަދި އަލީޒޭ މިރްޒާ އަކީ އެހެން މީހުންނާ އަޅާބަލާއިރު ވަރަށް ބޮޑަށް ހަރުދަނާ އަދި ވިސްނުންތެރި ދެމީހުންގެ ގޮތުގައި ގިނަ ބަޔަކު ސިފަކޮށްފައިވެއެވެ.
މި ޝޯއިން ދައްކާ އަލިގަދަ ވިދުންތަކުގެ ފުރަގަހުގައި ވަނީ އެކަނިވެރިކަން ފޮރުވަން މަސައްކަތްކުރާ ބައެއްގެ ހިތާމަވެރި ދިރިއުޅުމެވެ. ފައިސާއަށް އަގުބޮޑު ޕާޓީތަކާއި 'ބާކިން' ކޮތަޅުތައް ގަނެވުނު ނަމަވެސް، ހަގީގީ އެކުވެރިކަމާއި، ވަފާތެރިކަމާއި، އަދި ހަމަޖެހޭ އުފާވެރި ގުޅުންތަކަކީ ފައިސާއަށް ގަނެވޭނެ އެއްޗެއް ނޫންކަން މި ޝޯއިން ހާމަކޮށްދެއެވެ.
އެހެންކަމުން، "ދޭސީ ބްލިންގް" ބަލައި ނިމުމުން ހަސަދަވެރިކަމާއި ޝުކުރުވެރިކަން އެއްފަހަރާ އިހުސާސް ކުރެވެއެވެ. އެމީހުން ގެންގުޅޭ ކާރުތަކާއި، ހެދުންތަކާއި، އަދި ބޮޑެތި ގަނޑުވަރުތައް ބޭނުންވި ނަމަވެސް އެތައް ގަޑިއިރެއް ވަންދެން އެމީހުންގެ މެދުގައި އޮންނަ މައްސަލަތަކާއި ދޮގުވެރިކަން ބަލަން އިނުމުން، އާދައިގެ ހަމަޖެހޭ ދިރިއުޅުމުގެ އަގު ވަޒަންކުރެވެއެވެ.
އެހެނީ، އެ އަގުބޮޑު ޖަވާހިރުތަކާއި މައްސަލަބޮޑު ދިރިއުޅުމުގެ ތެރެއިން، މި ޝޯއިން އިއްތިފާގުން ދައްކުވައިދެނީ އަހަރެމެންގެ އާދައިގެ ދިރިއުޅުން މާ އުފާވެރިކަމެވެ.