އޮސްޓްރޭލިއާގެ އީ-ސޭފްޓީ ކޮމިޝަނުން ކުރިއަށްގެންދިޔަ ދިރާސާއަކުން ދައްކާގޮތުގައި، އެ ގައުމުގެ 10 އަހަރާއި 17 އަހަރާ ދެމެދުގެ ކުދިންގެ ތެރެއިން 54 އިންސައްތަ ކުދިން އަމިއްލަ އަދި އިޖުތިމާއީ ކަންކަމުގައި އާޓިފިޝަލް އިންޓެލިޖެންސް (އޭއައި) ވަސީލަތްތައް ބޭނުންކުރާއިރު، އޭގެ ތެރެއިން ގިނަ ކުދިން ވަނީ ނަފްސާނީ އެހީތެރިކަމާއި އަމިއްލަ މައްސަލަތަކުގައި ލަފާ ހޯދުމަށް ޗެޓްބޮޓްތަކުގެ އެހީތެރިކަން ހޯދަން ފަށާފައެވެ.
ޖުމްލަ 1,950 ކުދިން ބައިވެރިވި މި ދިރާސާއިން އެނގުނުގޮތުގައި 78 އިންސައްތަ ކުދިން ވަނީ ޗެޓްޖީޕީޓީ، ޖެމިނައި ނުވަތަ ކްލޯޑް ފަދަ އޭއައި އެސިސްޓެންޓެއް ކޮންމެވެސް ސިފައެއްގައި ބޭނުންކޮށްފައެވެ. އަދި އޭގެ ތެރެއިން 20 އިންސައްތަ ކުދިން ކޮންމެ ދުވަހަކުވެސް މިފަދަ ވަސީލަތްތައް ބޭނުންކުރާކަން ފާހަގަކުރެވިފައިވެއެވެ.
އާންމުކޮށް ފިލާވަޅުތައް ހެދުމަށާއި، ލިޔުންތައް އެޑިޓްކުރުމަށާއި، މައުލޫމާތު ހޯދުމަށް އޭއައި ބޭނުންކުރި ނަމަވެސް، ގިނަ އަދަދެއްގެ ކުދިން ވަނީ އަމިއްލަ ދިރިއުޅުމުގެ މުހިންމު ކަންކަމުގައިވެސް އޭއައިގެ އެހީތެރިކަން ހޯދާފައެވެ. އެގޮތުން ޖިސްމާނީ ސިއްހަތާއި، ވަކި ކަންކަމުގައި އަމަލުކުރާނެ ގޮތުގެ އިރުޝާދު ހޯދުމުގެ އިތުރުން، ނަފްސާނީ ސިއްހަތާ ގުޅޭގޮތުން ލަފާ ހޯދުމަށް އޭއައި ބޭނުންކުރާ ކުދިންގެ އަދަދު މަދެއް ނޫނެވެ.
މީގެއިތުރުން، އެކަނިވެރިކަން ފިލުވައިދޭ އަދި ވާހަކަދައްކައިދޭ އޭއައި ކޮމްޕެނިއަންސް ބޭނުންކުރާ ކުދިންގެ ތެރޭގައި ނުކުޅެދުންތެރިކަން ރަމްޒުކޮށްދޭ ކުދިންނާއި ޖިންސީ ހަމަހަމަ ކަމަށް ލޯބިކުރާ ކުދިން ގިނަކަން ފާހަގަކުރެވިފައިވެއެވެ.
މިގޮތަށް އޭއައި ބޭނުންކުރުން އިތުރުވަމުންދާއިރު، އޭގެ ސަބަބުން ކުދިންގެ ނުފޫޒާއި ނުރައްކަލަށް ހުށަހެޅޭ މިންވަރު ވަނީ އިތުރުވެފައެވެ. ސިއްހީ އަދި ނަފްސާނީ އިރުޝާދު ހޯދުމުގެ ތެރޭގައި އަމިއްލަ މަޢުލޫމާތު އޭއައިއަށް ހިއްސާކުރެވޭއިރު، މިފަދަ ކުންފުނިތަކުން އެ މައުލޫމާތުގެ ރައްކާތެރިކަން ކަށަވަރުކޮށްދިނުމުގެ ގާނޫނީ ޒިންމާއެއް ނަގާފައެއް ނުވެއެވެ.
މީގެ އިތުރުން، އޭއައި މޮޑެލްތަކުން ބައެއް ފަހަރު ނުރައްކާތެރި ނުވަތަ ނުރަނގަޅު މައުލޫމާތު ދިނުމާއި، ހަގީގަތާ ހިލާފު ވާހަކަތައް އުފެއްދުމުގެ ފުރުސަތު އޮތުމަކީ ކުދިންގެ ފިކުރަށް ނޭދެވޭ އަސަރުކުރާނެ ކަމެކެވެ.
މިފަދަ ނުރައްކާތަކުން ކުދިން ރައްކާތެރިކުރުމަށްޓަކައި، ބެލެނިވެރިންނާއި މުދައްރިސުން އޭއައިގެ ބޭނުމާއި އޭގެ އިންތަކާ ބެހޭގޮތުން ކުދިންނާ ވާހަކަދައްކައި ހޭލުންތެރިކަން އިތުރުކުރުން މުހިންމެވެ.
އޭއައިއަކީ ކަންކަން އަވަސްކޮށްދޭ ވަސީލަތެއް ކަމުގައިވިޔަސް، އެއީ އިންސާނީ ވިސްނުމާއި އިހުސާސްތައް ފުރިހަމައަށް ދެނެގަނެވޭނެ އެއްޗެއް ނޫންކަން ކުދިންނަށް ވިސްނައިދީ، އާއިލީ ގުޅުންތަކުގެ ތެރެއިން އެހީތެރިކަން ހޯދުމުގެ މުހިންމުކަން ބޮޑެވެ.