މެލޭޝިއާގައި އެންމެ ދިގު މުއްދަތަކަށް ބޮޑުވަޒީރުކަން ކުރެއްވި މަހާތިރު މުހައްމަދުގެ އަނބިކަނބަލުން ސިތީ ހަސްމާ މުހައްމަދު އަލީ، އުމުރުފުޅުން 100 އަހަރުގައި މިއަދު އަވަހާރަވެއްޖެއެވެ.
މަހާތިރުގެ އޮފީހުން ނެރުނު ބަޔާނެއްގައި ބުނި ގޮތުގައި، އާންމު ސިއްހަތަށް ވަކާލާތުކުރެއްވި ސިތީ ހަސްމާ އަވަހާރަވީ ކުއަލަލަމްޕޫރުގައި ހުންނަ ނޭޝަނަލް ހާޓް އިންސްޓިޓިއުޓްގައި ފަރުވާ ހޯއްދަވަމުން ދަނިކޮށެވެ.
ސިތީ ހަސްމާގެ މައްޗަށް ދައުލަތުގެ އެންމެ މަތީ އިއްޒަތުގައި ކަށުނަމާދު ކުރުމަށް ހަމަޖެހިފައިވާ ކަމަށް މެލޭޝިއާގެ ބޮޑުވަޒީރު އަންވަރު އިބްރާހީމް ވަނީ އިއުލާންކުރައްވާފައެވެ. އަންވަރު ނެރުއްވި ބަޔާނެއްގައި ވިދާޅުވި ގޮތުގައި، މުޅި ގައުމުން ވެސް އެކަމަނާގެ މައިވަންތަކަމުގެ ސިފަތައް ހަނދާންކޮށް، ގައުމަށް ކޮށްދެއްވި ޚިދުމަތްތަކުގެ އަގުވަޒަންކުރާނެއެވެ.
ސިތީ ހަސްމާއަކީ މެލޭޝިއާގެ ސިއްހީ ދާއިރާގައި ފާހަގަކޮށްލެވޭ ޚިދުމަތްތަކެއް ކުރެއްވި ބޭފުޅެކެވެ. އެކަމަނާއަކީ މަހާތިރު ނިސްބަތްވެވަޑައިގަންނަވާ ކެޑާ ސްޓޭޓްގައި މެޑިކަލް އޮފިސަރެއްގެ މަގާމު ފުރުއްވި ފުރަތަމަ އަންހެން ބޭފުޅާއެވެ. ސިޔާސީ ލީޑަރެއްގެ އަނބިކަނބަލެއްގެ ހައިސިއްޔަތުން އެކަމަނާ ވަނީ މައިންގެ ސިއްހަތު ކުރިއެރުވުމަށާއި، އާއިލާ ރޭވުމުގެ ޕްރޮގްރާމްތަކަށާއި، މަސްތުވާތަކެއްޗާ ދެކޮޅަށް ކުރެވޭ މަސައްކަތްތަކަށް ވަރަށް ބޮޑަށް ވަކާލާތުކުރައްވާފައެވެ.
މަހާތިރާއި ސިތީ ހަސްމާ ބައްދަލުވެވަޑައިގަތީ 1940 ގެ އަހަރުތަކުގެ ފަހުކޮޅު ސިންގަޕޫރުގެ ކިންގް އެޑްވާޑް ސެވަންތް ކޮލެޖް އޮފް މެޑިސިންއިން ކިޔަވާވިދާޅުވި ދުވަސްވަރުއެވެ. މިދިޔަ އޮގަސްޓް މަހު ކައިވެންޏަށް 70 އަހަރު ފުރުނު މި ދެކަނބަލުންނަށް ހަތް ބޭފުޅުން ލިބިވަޑައިގެންފައިވެއެވެ. އޭގެ ތެރޭގައި ވިޔަފާރިވެރިޔާ މުހްޒާނީއާއި، އިޖުތިމާއީ ހަރަކާތްތެރިޔާ މަރީނާ މަހާތިރުގެ އިތުރުން ސިޔާސީ ދާއިރާގައި ހަރަކާތްތެރިވެވަޑައިގަންނަވާ މުހްރިޒް މަހާތިރު ހިމެނިވަޑައިގަންނަވައެވެ. މަހާތިރުގެ ހަރުކަށި މިޒާޖާ ހިލާފަށް، ސިތީ ހަސްމާ ފާހަގަކުރެވިފައިވަނީ އާންމުންނާ ގުޅޭ ހިތްތިރި ބޭފުޅެއްގެ ގޮތުގައެވެ.
އުމުރުފުޅުން 101 އަހަރުގެ މަހާތިރު ވަނީ މެލޭޝިއާގެ ބޮޑުވަޒީރުކަން ދެ ފަހަރެއްގެ މަތިން 24 އަހަރަށް ވުރެ ދިގު މުއްދަތަކަށް ކުރައްވާފައެވެ. އެގޮތުން 1981 އިން 2003 އަށް އެމަނިކުފާނު ކުރެއްވި ވެރިކަމުގައި މެލޭޝިއާ ވަނީ ސިނާއީ ގޮތުން ބޮޑެތި ކުރިއެރުންތަކެއް ހޯދައި، އިގުތިސާދީ ބާރަކަށް ވެފައެވެ. އޭގެ ފަހުން 2018 ވަނަ އަހަރު ރިޓަޔަމަންޓުން ނުކުމެވަޑައިގެން، ވަންއެމްޑީބީގެ ހިޔާނާތުގެ މައްސަލައިގައި ތުހުމަތުކުރެވުނު ނަޖީބު ރައްޒާގުގެ ވެރިކަން ނިމުމަކަށް ގެންނަވައި، ދެވަނަ ފަހަރަށް ބޮޑުވަޒީރުކަމާ ހަވާލުވެވަޑައިގަތެވެ.
މަހާތިރު ކުރިން ސީއެންއެންއަށް ދެއްވި އިންޓަވިއުއެއްގައި ވިދާޅުވި ގޮތުގައި، އެމަނިކުފާނަށް ލިބިވަޑައިގަތް ކާމިޔާބީގެ މައިބަދައަކީ ސިތީ ހަސްމާއެވެ. އަދި އެ ޒަމާނުގައި މެލޭޝިއާގެ އަންހެނުން ޔުނިވާސިޓީ ތައުލީމު ހާސިލުކުރުމަކީ ވަރަށް ނާދިރު ކަމަކަށް ވީނަމަވެސް، ޑިގްރީއެއް ހާސިލުކުރެއްވުމަށް ސިތީ ހަސްމާ ދެއްކެވި އަޒުމަކީ އެކަމަނާގެ ޝަހުސިއްޔަތުގެ ވަރުގަދަކަން ދައްކުވައިދޭ ކަމެއް ކަމަށް މަހާތިރު ފާހަގަކުރެއްވިއެވެ.
ސިތީ ހަސްމާގެ ކަށުނަމާދު މިއަދު އަސުރު ނަމާދަށް ފަހު ބޭއްވުމަށް ހަމަޖެހިފައިވާއިރު، އެކަމަނާ ފަސްދާނުލުމަށް ހަމަޖެހިފައިވަނީ ޕުޓްރަޖާޔާގެ ޕްރެސިންޓް 20 ގެ މުސްލިމުންގެ ގަބުރުސްތާނުގައެވެ.