ދުނިޔޭގެ ޕާސްޕޯޓުތަކުގެ ބާރުމިން ވަޒަންކުރާ "ދަ ޕާސްޕޯޓް އިންޑެކްސް ގްލޯބަލް ރޭންކިން 2026" ގެ ދެވަނަ ދަރަޖައަށް މެލޭޝިއާގެ ޕާސްޕޯޓު ޖެހިލައިފިއެވެ.
މިއީ ވޭތުވެދިޔަ އަހަރު މެލޭޝިއާ އޮތް ތިންވަނަ ދަރަޖައާ އަޅާބަލާއިރު ލިބުނު ބޮޑު ކުރިއެރުމެކެވެ.
މެލޭޝިއާގެ އިމިގްރޭޝަން ޑިޕާޓްމަންޓުން ސޯޝަލް މީޑިއާގައި ހާމަކުރި ގޮތުގައި، މި ކާމިޔާބީއަކީ މެލޭޝިއާގެ ޕާސްޕޯޓުގެ ވަރުގަދަކަމާއި، ބައިނަލްއަޤްވާމީ ދުނިޔޭގައި އެ ޤައުމުގެ ޕާސްޕޯޓަށް އޮތް އިތުބާރާއި ގަބޫލުކުރުން ހާމަކޮށްދޭ އަލިގަދަ ހެއްކެކެވެ.
މި ރޭންކިން ދައްކާގޮތުން މެލޭޝިއާގެ ޕާސްޕޯޓު އޮންނަ ފަރާތްތަކަށް ދުނިޔޭގެ 175 މަންޒިލަކަށް ދަތުރުކުރުމުގެ ފުރުސަތު ލިބެއެވެ. މީގެ ތެރޭގައި ވިސާއާ ނުލައި ދަތުރުކުރެވޭ 129 ގައުމަކާއި، އެތެރެވާއިރު ވިސާ ދޫކުރާ (ވިސާ އޮން އެރައިވަލް) 46 ގައުމެއް ހިމެނެއެވެ. އަދި ދުރާލާ ވިސާ ނަގަންޖެހެނީ އެންމެ 23 މަންޒިލަކަށެވެ.
ޕާސްޕޯޓް އިންޑެކްސްގެ ރަސްމީ ވެބްސައިޓުގައިވާ މައުލޫމާތުތަކަށް ބަލާއިރު، މި ލިސްޓުގެ އެއްވަނައިގައި އޮތީ ޔުނައިޓެޑް އަރަބް އެމިރޭޓްސް (ޔޫއޭއީ) ގެ ޕާސްޕޯޓެވެ.
ދެވަނަ ދަރަޖައިގައި މެލޭޝިއާގެ އިތުރުން ސިންގަޕޫރު ވެސް ހިމެނެއެވެ.
ލިސްޓުގެ ތިންވަނައިގައި ސްޕެއިން އޮތްއިރު، ހަތަރުވަނަ ދަރަޖަ 16 ގައުމަކުން ހިއްސާކުރެއެވެ.
އޭގެ ތެރޭގައި ބެލްޖިއަމް، ޑެންމާކް، ޖަރުމަނުވިލާތް، ސްވިޑަން، އިޓަލީ، ސްވިޒަލޭންޑް، އޮސްޓްރިއާ އަދި ނޯވޭ ފަދަ ގައުމުތައް ހިމެނެއެވެ.