ރާއްޖެ އެތެރެކުރަން އުޅުނު 11.7 ކިލޯއަށް ވުރެ ގިނަ މަސްތުވާތަކެތި ކަސްޓަމްސްއިން އަތުލައިގެންފިއެވެ.
ކަސްޓަމްސްއިން ބުނީ، މި މަހު ހަތް ވަނަ ދުވަހު އެ ތަކެތި އަތުލައިގަތީ ވެލާނާ އިންޓަނޭޝަނަލް އެއާޕޯޓު މެދުވެރިކޮށް ކަމަށެވެ.
މިގޮތުން، 11.7 ކިލޯގެ ކެނަބިސް ކަސްޓަމްސްއިން އަތުލައިގަތީ، ކޫރިއާ މެދުވެރުކޮށް ރާއްޖެ ގެނެސްފައިވާ ދެ ޕެކޭޖެއް ބަލައި ފާސްކުރަމުން ދިޔައިރު، އޭގެތެރޭގައި މަސްތުވާތަކެތި ފޮރުވާފައި ހުރި ކަމަށް ޝައްކުކުރެވިގެން އިތުރަށް ޗެކުރުމުގެ ތެރޭގައެވެ.
މި މައްސަލައިގައި މިހާތަނަށް މީހަކު އަތުލައިގަތް ކަމެއް ނުވަތަ ނޫން ކަމެއް ކަސްޓަމްސްއިން ހާމައެއް ނުކުރެއެވެ.
ފާހަގަކުރެވޭ ގޮތުގައި، މަސްތުވާތަކެތީގެ މައްސަލަތައް ރާއްޖޭގައި އިތުރުއިރު، ހަށިގަނޑުގައި ފޮރުވައިގެންނާއި ޕެކޭޖު މެދުވެރިކޮށް އެތެރެކުރާ މަސްތުވާތަކެތި ދޭތެރެދޭތެރެއިން އަތުލައިގަނެއެވެ. އެ ފަދަ މައްސަލަތަކުގައި ބިދޭސީން ވެސް ހައްޔަރުކުރާއިރު، މި މައްސަލަ ހައްލުކުރުމަށް ސަރުކާރުން އަންނަނީ މަސައްކަތްތައް ކުރަމުންނެވެ.