ޗައިނާއިން ދިވެހިރާއްޖެއަށް ކަނޑައެޅުއްވި އައު ސަފީރު ކޮންގް ޝިއަންހުއާ، އެމަނިކުފާނުގެ ސަފީރުކަމުގެ ފަތްކޮޅު ރައީސަށް މިއަދު އަރުވައިފިއެވެ.
އެމަނިކުފާނުގެ ސަފީރުކަމުގެ ފަތްކޮޅު އެރުވީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައެވެ.
މި ރަސްމިއްޔާތަށް ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާހަމައަށް ސަފީރު ވަޑައިގެންނެވީ ހަތްކޮޅުގައި ރަސްމީ ޢިއްޒަތުގައި ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވައިފައެވެ.
ސަފީރުކަމުގެ ފަތްކޮޅު އެރުވުމަށްފަހު ރައީސް ވަނީ ސަފީރަށް ދިވެހިރާއްޖެއަށް މަރުޙަބާ ދަންނަވާފައެވެ. އަދި ދެ ޤައުމުގެ މަޞްލަޙަތު ހިމެނޭ ކަންކަމާ ބެހޭގޮތުން ދެ ބޭފުޅުން ވަނީ މަޝްވަރާކުރައްވާފައެވެ.
ސަފީރު ވަނީ ދިވެހިރާއްޖޭގެ އަވަސް ބޭނުންތަކަށް ޗައިނާ ސަރުކާރުން އެހީތެރިކަން ފޯރުކޮށްދޭނެ ކަމުގެ ޔަގީންކަން ރައީސަށް ދެއްވާފައެވެ. އަދި ދެ ޤައުމުގެ ދެމެދުގައިވާ ވަރުގަދަ ގުޅުން ފާހަގަކޮށް ދެބޭފުޅުން ވަނީ މަޝްވަރާ ކުރައްވާފައެވެ.
އައު ސަފީރު މިއަދު މަގާމާ ހަވާލުވެ ރައީސަށް ފަތްކޮޅު އެރުވިއިރު، އޭގެ ކުރިން ކުރީގެ ރައީސް އިބްރާހިމް މުޙައްމަދު ޞާލިހުގެ ވެރިކަމުން، މި ދައުރުގެ ފުރަތަމަ ކޮޅާ ހަމައަށް ޗައިނާ ސަފީރަކަށް ހުންނެވީ ވަންގް ލިޒިންއެވެ.
ދިވެހިރާއްޖެއާއި ޗައިނާއާ ދެމެދު ޑިޕްލޮމެޓިކް ގުޅުން ޤާއިމުކުރެވުނީ 14 އޮކްޓޯބަރު 1972 ގައެވެ.