ބޭންކް އޮފް މޯލްޑިވްސް (ބީއެމްއެލް)އިން ހިއްސާއަކަށް 55 ރުފިޔާގެ މަގުން މުޅި ޖުމްލަ 296 މިލިއަން ރުފިޔާ ބަހަން ހިއްސާދާރުން ފާސްކޮށްފިއެވެ.
ބާސެލޯސް ނަސަންދުރާގައި މިރޭ އޮތް ބީއެމްއެލްގެ އަހަރީ އާންމު ޖަލްސާގައި ފާސްކުރި މި އަދަދަކީ، އެ ބޭންކުގެ ތާރީޚުގައި ވެސް ހިއްސާގެ ފައިދާގެ ގޮތުގައި ބަހާ އެންމެ ބޮޑު އަދަދެވެ.
ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު ވިދާޅުވީ މި ރެކޯޑު އަދަދުގެ ފައިދާއަކީ ބޭންކުގެ ވިޔަފާރީގެ ހަރުދަނާކަމާއި މުވައްޒަފުންގެ ބުރަ މަސައްކަތުގެ ނަތީޖާ ކަމަށެވެ.
ބޭންކަށް ކަސްޓަމަރުންނާއި ހިއްސާދާރުން ދެއްވާ އެއްބާރުލެއްވުމަށާއި ކުރައްވާ އިތުބާރަށް ޚާއްސަ ޝުކުރެއް އޭނާ އަދާކުރެއްވިއެވެ.
"އަޅުގަނޑުމެން ކުރިމަގުގައިވެސް މާލީ ކުރިއެރުން ހޯދުމާއެކު، އެންމެ ފުރިހަމަ ޚިދުމަތެއް ފޯރުކޮށްދިނުމުގެ މަސައްކަތުގައި ދެމި ތިބޭނަން" ޝަރީފް ވިދާޅުވިއެވެ.
ހިއްސާގެ ފައިދާ ލިބޭނީ ބުކް ކްލޯޝާ ޑޭޓާއި ހަމައަށް ބޭންކުގެ ހިއްސާދާރުންގެ ގޮތުގައި ރަޖިސްޓަރީވެފައިވާ ފަރާތްތަކަށް އެކަންޏެވެ.