ސަރުކާރު ހިންގާ ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ މެންބަރުން ތިއްބެވީ އެ ބޭފުޅުންގެ ސިކުނޑި ރައީސް ޑރ. މުހައްމަދު މުއިއްޒާ ހަވާލުކުރައްވައިގެން ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް މިއަދު ވިދާޅުވެއްޖެއެވެ.
ތެލަސީމިއާ ކޮންޓްރޯލްކުރުމާ ބެހޭ ބިލު މަޖިލީހުން ފާސްކުރުމުން ރައީސް ވަނީ ތަސްދީގުނުކުރައްވައި، އަނބުރާ ފޮނުވާލައްވާފައެވެ. އެހެންވެ، ޕީއެންސީ މެންބަރުން އެ ބިލު އިސްލާހުކުރަން ޖެހުމުން އެމްޑީޕީ މެންބަރުން ވަނީ ފާޑު ވިދާޅުވެފައެވެ.
ބިލަށް ބަހުސްކުރައްވަމުން މީކާއީލް ވިދާޅުވީ، މިއަދު ހާމަވަމުންދަނީ ރައްޔިތުންގެ މަޖިލީސް ހަމަ ހަގީގަތުގައި ވެސް ރައީސުލްޖުމްހޫރިއްޔާގެ މަޖިލީހަށް ބަދަލުވެފައި އޮތްކަން ކަމަށެވެ.
"ބިލު ފޮނުއްވަވަނީ ވެސް ރައީސުލްޖުމްހޫރިއްޔާ. މި ތަނުން ބިލު ފާސްކުރައްވަނީ ވެސް ރައީސުލްޖުމްހޫރިއްޔާގެ މެންބަރުން، އެ ބޭފުޅުން ހަމަ އެ ބޭފުޅުންގެ ރައީސުލްޖުމްހޫރިއްޔާ ބޭނުންފުޅުވާ ގޮތަށް. އެ ބިލު ރައީސުލްޖުމްހޫރިއްޔާ ތަސްދީގުކުރައްވަން ފޮނުވީމާ އެ ބިލު އަނބުރާ ފޮނުއްވާލައްވަނީ ވެސް ހަމަ ރައީސުލްޖުމްހޫރިއްޔާ،" އޭނާ ވިދާޅުވިއެވެ.
"މިތާ މި ތިއްބެވި މެންބަރުން މި ތިއްބެވީ ކިހިނެއްވެފައިތޯ އަޅުގަނޑު އެބަ ސުވާލުކޮށްލަން ބޭނުންވޭ،"
ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް: އޭނާ ވަނީ ސިކުނޑި ރައީސާ ހަވާލުނުކުރަން ގޮވާލާފައި -- ފޮޓޯ/ މަޖިލިސް
މީކާއީލް ވިދާޅުވީ، މީގެ ދުވަސްކޮޅެއް ކުރިން ތެލަސީމިއާ ކޮންޓްރޯލްކުރުމާ ބެހޭ ބިލަކީ ވަރަށް ފުރިހަމައަށް އޮތް ބިލެއް ކަމަށް ޕީއެންސީ މެންބަރުން ވިދާޅުވި ކަމަށެވެ. އެކަމަކު، މިއަދު އަނެއްކާ ވެސް ރައީސްގެ އެންގެވުމާ އެކު އެ މެންބަރުންގެ ހިޔާލު ބަދަލުވެއްޖެ ކަމަށް އޭނާ ވިދާޅުވިއެވެ.
ބިލެއްގައި މައްސަލައެއް އޮތްކަން ވެސް ފަހުމުވަނީ ރައީސް ވިދާޅުވުމުން ކަމަށް ވިދާޅުވެ، މީކާއީލް ވަނީ ވަރަށް ބޮޑަށް މެންބަރުންނަށް ފާޑު ވިދާޅުވެފައެވެ.
އޭނާ ވަނީ ޕީއެންސީ މެންބަރުންގެ ސިކުނޑި ކޮބާތޯ ސުވާލު އުފައްދަވާފައެވެ.
މީކާއީލް ވިދާޅުވީ، މެންބަރަކު އިންތިޚާބުކޮށްފައި ރައްޔިތުންގެ މަޖިލީހަށް ފޮނުވަނީ އެންމެހާ ރައްޔިތުންނަށް މަޖިލީހުގެ ތަޅުމަށް ނުވަދެވޭތީ އެ ރައްޔިތުން ބޭނުންވާ ގޮތަށް އެ ރައްޔިތުންގެ ހައްގުގައި ކަންކަން ނިންމަން ކަމަށެވެ.
"ރައީސުލްޖުމްހޫރިއްޔާއާއި ރައީސް އޮފީހާ އަމިއްލަ ސިކުނޑި ހަވާލުކޮށްފައި އިއްޒަތްތެރި ރައީސް އަޅުގަނޑުމެން މި ތިބެނީ މިތާ ބަހުސްކުރަން. ރައީސުލްޖުމްހޫރިއްޔާ އެންގެވިއްޔާ އެންގެވިހާ ގޮތަކަށް،" އޭނާ ވިދާޅުވިއެވެ.
މީކާއީލް ވަނީ ބިލުތަކަށް ބަހުސްކުރާއިރު ޕީއެންސީގެ މެންބަރުން އެ ބިލެއްގައި އޮތީ ކޯޗެއްކަން ވެސް ނޭނގޭ ކަމަށް ތުހުމަތުކުރައްވާފައެވެ. އަދި، މަޖިލީހަކީ ރައީސް އޮފީހުގެ ކުޑަކުޑަ ކޮޓަރިއަކަށް ބަދަލުވާތަން ފެނުނީމާ ހަގީގަތުގައި ވެސް ހިތުގައި ވޭން އަޅާ ކަމަށް އޭނާ ވިދާޅުވިއެވެ.
އެހެންވެ، މެންބަރުންގެ ސިކުނޑި ރައީސް މުއިއްޒާ ހަވާލުނުކުރަން އޭނާ ވަނީ ގޮވާލައްވާފައެވެ.
ފާހަގަކޮށްލެވޭ ގޮތުގައި މީކާއީލް އެ ވާހަކަދެއްކެވުމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ ބިލެއް އިސްލާހުކުރަން ބޭނުންނަމަ އެ ބިލެއް އަނބުރާ މަޖިލީހަށް ފޮނުވާލުމަކީ ގާނޫނުއަސާސީގެ ދަށުން ރައީސަށް ލިބިދޭ ހައްގެއް ކަމަށެވެ.
އަދި، މެންބަރުން ބޭނުންފުޅު ނަމަ އެއްވެސް އިސްލާހެއް ނުގެނެސް އަނެއްކާ ވެސް އޮތްގޮތަށް ފާސްކުރުމުގެ ފުރުސަތު ވެސް އެބައޮތް ކަމަށް އެ މަނިކުފާނު ވިދާޅުވިއެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ: އެ މަނިކުފާނު ވިދާޅުވީ، ރައީސް އޮފީހުން ބިލުތައް ނިންމާ ނަމަ އަނބުރާ ފޮނުވާލަން ނުޖެހޭނެ ކަމަށް -- ފޮޓޯ/ މަޖިލީސް
"ރައީސުލްޖުމްހޫރިއްޔާގެ އޮފީހުގެ ކޮޓަރިއަކުން މައްސަލަ ނިންމާ ކަމަށްވަންޏާ އަނބުރާ މި ތަނަށް މައްސަލަ ފޮނުވާލުމުގެ ބޭނުމެއް ނެތް،" އަބްދުއްރަހީމް ވިދާޅުވިއެވެ.
އެ މަނިކުފާނު ވަނީ މެންބަރުންގެ މަސްއޫލިއްޔަތުތަކާއި ވާޖިބުތައް ދަސްކުރައްވައިގެން ބަހުސްކުރައްވަން މެންބަރުންނަށް ގޮވާލައްވާފައެވެ.
މި ހިނގާ 20ވަނަ މަޖިލީހުގައި ޖުމުލަ 93 މެންބަރުން ތިއްބަވާއިރު އޭގެ ތެރެއިން 75 މެންބަރުންނަކީ ސަރުކާރު ހިންގާ ޕީއެންސީއަށް ނިސްބަތްވާ މެންބަރުންނެވެ. އެހެންވެ، މަޖިލީހަކީ 'ސަރުކާރުން ބޭނުން ގޮތަކަށް' ކަންކަން ނިންމާ ތަނެއް ކަމަށް ބުނެ އިދިކޮޅު ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.
މަޖިލީހުން ވަނީ މެންބަރަކު ޕާޓީ ބަދަލުކުރުމުންނާއި ޕާޓީން ވަކިކުރުމުން ވެސް ގޮނޑި ގެއްލޭ ގޮތަށް ގާނޫނުއަސާސީއަށް ވެސް އިސްލާހު ގެނެސްފައެވެ.