މީޑިއާތައް ''ކޮންޓްރޯލް ކުރުމަށް'' ރައްޔިތުންގެ މަޖިލީހަށް ހުށަހަޅާފައިވާ ބިލާ ދެކޮޅަށް ކުރި މުޒާހާރާގައި ނޫސްވެރިން ހިފަހައްޓައި, އެ މީހުންނަށް ހުރަސްއެޅުމުން ދައްކުވައިދެނީ މި ސަރުކާރުން ގައުމު ގެންދާ ނުރައްކާތެރި މިސްރާބު ކަމަށް، އިދިކޮޅު އެމްޑީޕީން މިއަދު ބުނެފިއެވެ.
ސަރުކާރު ހިންގާ ޕީއެންސީގެ ސުޕަމެޖޯރިޓީ އޮންނަ މަޖިލީހުން ދައުރުން ބޭރުން މިއަދު ބޭއްވި ޖަލްސާއެއްގައި މީޑިއާ ބިލު ވަނީ ބަލައިގަނެ، ކޮމިޓީއަށް ފޮނުވައިފައެވެ. އެއީ، އެ ބިލާ ދެކޮޅަށް މިއަދު ހެނދުނުން ފެށިގެން ނޫސްވެރިން މަޖިލިސް ކައިރީގައި މުޒާހަރާ ކުރަމުން ދަނިކޮށެވެ.
އެ މުޒާހަރާގެ ބައިވެރިން ފަހުން ރައީސް އޮފީސް ކައިރީގައި ތިއްބައި ފުލުހުން ވަނީ މުޒާހަރާއަށް ހުރަސްއަޅައިފައެވެ.
އެގޮތުން، ދައުރުގެ ނޫސްވެރިޔާ މުޒައްޔިން ނާޒިމާއި އަދަދު ނޫހުގެ ދެ ނޫސްވެރިން ކަމަށްވާ މުހައްމަދު ޝަހުޒާނާއި އަހުމަދު އާއިދުގެ އިތުރުން ސިޓިޒެން ނޫހުގެ ނޫސްވެރިޔާ އަދި މީޑިއާ ކައުންސިލްގެ ކުރީގެ މެންބަރު މޫސާ ރަޝީދު، ހިފަހައްޓައިގެން ގެންގޮސްފައިވެއެެވެ. އޭގެ ތެރެއިން ބައެއް ނޫސްވެރިން ގެންގޮސް ފުލުހުންގެ އުޅަނދަށް އެރުވި ނަމަވެސް، ގާނޫނީ އިންޒާރު ދިނުމަށް ފަހު ވަނީ ދޫކޮށްލައިފައެވެ.
ފުލުހުންގެ އަމަލުތައް ކުށްވެރިކޮށް، އެމްޑީޕީން ނެރުނު ބަޔާނެއްގައި ވަނީ، ސުލްހަވެރިކޮށް މުޒާހާރާ ކުރަނިކޮށް ނޫސްވެރިން ހިފެހެއްޓީ، އެއްވެސް ސަބަބެއް ނެތި ގާނޫނާ ޚިލާފަށް ކަމަށެވެ.
ނޫސްވެރިންގެ އެެއްވެސް މަޝްވަރާއެއް ނެތި، އުފައްދާފައިވާ އެ ބިލަކީ މިނިވަން ނޫސްވެރިކަމަށް އޮތް ހުރަހަކަށް ވާނެ ކަމަށް އެމްޑީޕީން ވަނީ ބުނެފައެވެ.
ރައީސް ޑރ. މުޙައްމަދު މުއިއްޒު ވެރިކަމާ ހަވާލުވީ ފަހުން މަސައްކަތް ކުރެއްވީ މިނިވަން މުއައްސަސާތަކުގެ ބާރު ކަނޑުވާލައި، ވެރިކަމުގެ ނިޒާމުގެ ހުރިހާ ބާރުތަކެއް ނަންގަވަން ކަމަށް އެ ޕާޓީން ތުހުމަތުކުރެއެވެ.
މީގެ އިތުރުން، މިއަދު ނޫސްވެރިންނަށް ހުރަސްއެޅުމުން، މި ސަރުކާރުގެ ދަށުން ގައުމު ދަނީ ކިހާ ނުރައްކާތެރި މިސްރާބަކަށްކަން ދައްކުވައިދޭ ކަމަށް އެ ޕާޓީގެ ބަޔާނުގައިވެއެވެ.
އެ ބިލަށް ތާއިދުކޮށް ސަރުކާރުން މެންބަރުން ވާހަކަދެއްކެވިއިރު، ރައީސް ޑރ. މުހައްމަދު މުއިއްޒު ވަނީ މީޑިއާ ކޮންޓްރޯލް ކުރަން ޝައުގެއް ނެތް ކަމަށާއި، މީޑިއާ ބިލުން ރައީސަށް ބާރުތައް ނުލިބޭ ގޮތަށް ބިލް ފާސްކުރަން މެންބަރުންނަށް އަންގަވައިފައިވާ ކަމަށް ވިދާޅުވެފައެވެ.
ފާހަގަކުރެވޭ ގޮތުގައި، ހަންނާން ހުށަހެޅުއްވި މީޑިއާ ބިލު ފާސްވެއްޖެނަމަ، ވަކިވަކި ނޫސްވެރިން 5،000 ރުފިޔާއާއި 25،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭއިރު މީޑިއާތައް 100،000 ރުފިޔާއިން ޖޫރިމަނާކުރެވެއެވެ.
މީގެ އިތުރުން، އެ ބިލުގެ ދަށުން އުފައްދާ މީޑިއާ ރެގިއުލޭޓަރީ ކޮމިޝަނަށް ހުށަހެޅޭ މައްސަލައެއް އެއްކޮށް ބަލައި ނުނިމެނީސް މީޑިއާތަކުގެ ރަޖިސްޓްރީ ބާތިލުކޮށް ނޫސްތައް ހުއްޓުވާލުމުގެ ބާރު ވެސް އާ ގާނޫނާ އެކު އުފައްދާ ކޮމިޝަނަށް ލިބޭނެއެވެ. އަދި، އެ ކޮމިޝަނަށް ތިން މެންބަރުން އައްޔަން ކޮށް, ކޮމިޝަންގެ ރައީސް ކަނޑައެޅުމުގެ ބާރު ދީފައިވަނީ ވެސް ރައީސްޖުމްހޫރިއްޔާއަށެވެ.