މީޑިއާ ބިލު: އާންމުންގެ ޚިޔާލަށް 10 ދުވަސް، މީޑިއާތަކާ މަޝްވަރާކުރަން ތިން ދުވަސް

މީޑިއާ ބިލާ ދެކޮޅަށް ނޫސްވެރިން މުޒާހަރާކުރުން: މަޖިލީހުގެ ކޮމިޓީން ވަނީ މީޑިއާ ބިލަށް އާންމުންގެ ޚިޔާލަށް ހުޅުވާލުމަށް އަށް ދުވަސް ދީ މީޑިއާތަކާ މަޝްވަރާކުރަން ތިން ދުވަސް ދޭން ނިންމައިފައި -- ސަން ފޮޓޯ/ މާނިއު މުހައްމަދު

ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް ރައްޔިތުންގެ މަޖިލީހަށް ހުށަހަޅައިފައިވާ ބިލާ ގުޅޭ ގޮތުން އާންމުންގެ ޚިޔާލު ހޯދާނީ 10 ދުވަހަށް ކަމަށާއި މީޑިއާތަކާ މަޝްވަރާކުރާނީ ތިން ދުވަހު ކަމަށް، ބިލު ދިރާސާކުރާ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފިއެވެ.

ސަރުކާރަށް އެއްބާރުލުންދެއްވާ، ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ބިލު، ވެރިކަން ކުރާ ޕީއެންސީގެ ސުޕަމެޖޯރިޓީ އޮންނަ މަޖިލީހުން ބަލައިގަނެ، މިނިވަން މުއައްސަސާތަކުގެ ކޮމިޓީއަށް ފޮނުވީ އިއްޔެއެވެ.

އެ ބިލުގެ މަސައްކަތް ފަށަން މިއަދު ބޭއްވި ކޮމިޓީ ބައްދަލުވުމުގައި ވަނީ ބިލުގެ މަސައްކަތް ކުރިއަށްގެންދާނެ ގޮތާއި، ބިލާ ގުޅޭ ގޮތުން އާންމުންނާއި ކަމާ ގުޅުންހުރި އިދާރާތަކުން ޚިޔާލު ހޯދުމާ ގުޅޭ ގޮތުން މަޝްވަރާކޮށްފައެވެ.

ޕީއެންސީގެ ގިނަ މެންބަރުން ތިއްބަވާ އެ ކޮމިިޓީގައި ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން ހުށަހެޅުއްވީ ބިލާ ގުޅޭ ގޮތުން އާންމުންގެ ޚިޔާލު ހޯދުމަށް މިއަދުން ފެށިގެން އަންނަ މަހުގެ ހަވަނަ ދުވަހުގެ ނިޔަލަށް އާންމުކޮށް ހުޅުވާލުމަށާއި ބިލުގެ މަސައްކަތް އަންނަ މަހުގެ 15އަށް ނިންމުމަށެވެ.

އެ ހުށަހެޅުމަށް ތާއިދުކުރައްވައި ކެލާ ދާއިރާގެ ޕީއެންސީ މެންބަރު އަބްދުﷲ ޝަރީފް ވިދާޅުވީ، މީޑިއާ ބިލަކީ ވަރަށް މުހިންމު ބިލެއް ކަމަށް ގަބޫލުކުރައްވާ ކަމަށާއި ބިލުގެ މަސައްކަތް ކުރިއަށްގެންދިޔުން ވެސް ވަރަށް މުހިންމު ކަމަށް ދެކެވަޑައިގަންނަވާ ކަމަށެވެ.

މިނިވަން މުއައްސަސާތަކުގެ ކޮމިޓީ: ކޮމިޓީން ވަނީ މީޑިއާ ބިލަށް އާންމުންގެ ޚިޔާލަށް އަށް ދުވަސް ދިނުމަށާއި މީޑިއާތަކާ މަޝްވަރާކުރަން ތިން ދުވަސް ދިނުމަށް ނިންމައިފައި -- ސަން ފޮޓޯ/ މާނިއު މުހައްމަދު

އެއަށްފަހު، ކޮމިޓީގެ މުގައްރިރު މާފުށީ ދާއިރާގެ މެންބަރު ހުސައިން ރިޒާ އާދަމް ވިދާޅުވީ، ނޫސްމަޖައްލާތަކާއި ކަމާ ގުޅޭ އިދާރާތަކުގެ ލަފައާއި މަޝްވަރާ ހޯދުމުގެ މަސައްކަތް އަންނަ އާދިއްތައިން ފެށިގެން ތިން ދުވަހަށް ކުރިއަށްގެންދިޔުމަށް ފެނިވަޑައިގަންނަވާ ކަމަށެވެ.

"ހަމައެއާއެކު އެ ބޭފުޅުން ބޭނުންވާ އިސްލާހުތައް ވެސް ލިޔުމުން ހުށަހަޅާ ގޮތަށް،" ރިޒާ ވިދާޅުވިއެވެ.

އެ ވާހަކައަށް ތާއިދުކުރައްވައި ޝަރީފް ވިދާޅުވީ، ކަމާ ގުޅުންހުރި ފަރާތްތަކާ ވަރަށް ފުޅާ ދާއިރާއެއްގައި މަޝްވަރާކުރުމާއި، މީޑިއާތަކުގައި ޚިޔާލު ލިޔުމުން ހޯދައިގެން ކުރިއަށްގެންދިޔުމަކީ މުހިންމު ކަމެއް ކަމަށެވެ.

ފެލިދޫ ދާއިރާގެ ޕީއެންސީ މެންބަރު އާދަމް ޒާހިރު ވެސް ވަނީ، މީޑިއާތަކާ، ޚާއްސަކޮށް މީޑިއާތައް މިހާރު ރެގިއުލޭޓް ކުރާ މޯލްޑިވްސް މީޑިއާ ކައުންސިލް (އެމްއެމްސީ)އާއި ބްރޯޑްކާސްޓިން ކޮމިޝަން (ބްރޯޑްކޮމް)އާ ބައްދަލުކުރަން ޖެހޭ ކަމަށް ވިދާޅުވެފައެވެ.

އަދި މިއާއެކީގައި ރަޖިސްޓްރީކުރެވިފައިވާ ނޫސްތަކަށް ހުޅުވާލައިގެން އެ ބޭފުޅުންގެ ތެރެއިން ބައިވެރިކުރަން ބޭނުންވާ ހުރިހާ ފަރާތްތައް ވެސް ބައިވެރިކޮށް އެ ބޭފުޅުންގެ ޚިޔާލު ހޯދައި މިކަމަށް އާދިއްތަ ދުވަހުން އަންގާރަ ދުވަހަށް ކަނޑައަޅައި، އެ ބޭފުޅުންގެ ޝަކުވާތަކާއި އެ ބޭފުޅުން ދެއްވާ ޚިޔާލު ވެސް އަޑުއަހަން ފުރުސަތު ހުޅުވާލަން އަޅުގަނޑު ތާއިދުކުރަން

ފެލިދޫ ދާއިރާގެ ޕީއެންސީ މެންބަރު އާދަމް ޒާހިރު

އެއަށްފަހު އިބްރާހީމް ހުސައިން ވަނީ، އެ ބިލަކީ ރައްޔިތުންނާ ގުޅުންހުރި، ރައްޔިތުންގެ ކަންބޮޑުވުންތައް ވެސް އޮތް ބިލެއް ކަމުން ހިއުމަން ރައިޓްސް ކޮމިޝަނުގެ ލަފާ ހޯދަން ވެސް ފެނިވަޑައިގަންނަވާ ކަމަށް ވިދާޅުވެފައެވެ.

"އަދި ޔޫތު މިނިސްޓްރީއަށް ވެސް، ވަރަށް ގިނަ ޒުވާނުންނާ ގުޅުންހުރި، ވަރަށް ގިނަ ޒުވާނުން އުޅޭ އެކިއެކި ސޯޝަލް މީޑިއާތަކުގައި އާއި ނޫސްތަކުގައި އާންމުކޮށް ވަރަށް ގިނަ ލިޔުންތައް ލިޔެފައި އަދި ޝާއިއުކުރަމުންދޭ، އެހެންވީމަ ޒުވާނުންނާ ގުޅޭ މިނިސްޓްރީން ވެސް މިކަމުގައި ބަހެއް ބުނުމަކީ ރަނގަޅު ކަމަކަށް ވެދާނެ،" އޭނާ ވިދާޅުވިއެވެ.

އެ ކޮމިޓީން ނެގި ވޯޓުގައިވަނީ، މެންބަރުން ހުށަހެޅުއްވި ގޮތަށް، އާންމުންގެ ޚިޔާލު ހޯދަން 10 ދުވަހާއި މީޑިއާތަކާ މަޝްވަރާކުރަން ތިން ދުވަސް ކަނޑައަޅަން ފާސްކޮށްފައެވެ.

މީޑިއާ ބިލު ގާނޫނަކަށްވެއްޖެ ނަމަ، އެ ގާނޫނުގެ ދަށުން އުފައްދާ ކޮމިޝަނުގައި ރައީސުލްޖުމްހޫރިއްޔާ އައްޔަން ކުރައްވާ ތިން މެންބަރުން ތިއްބަވާނެއެވެ. ބާކީ ހަތަރު މެންބަރުން މީޑިއާތަކުން ހޮވި ނަމަވެސް ކޮމިޝަންގެ ރައީސް ކަނޑައަޅުއްވާނީ ރައީސުލްޖުމްހޫރިއްޔާއެވެ. އަދި އެ ގާނޫނުގެ ދަށުން މައްސަލައެއް ބަލަމުންދާއިރު ވެސް މީޑިއާތަކަށް ފިޔަވަޅު އެޅޭނެއެވެ.

އެ ބިލު ހުށަހަޅެމާއެކު ބިލާ ދެކޮޅަށް ނޫސްވެރިން ވަނީ ޚިޔާލު ފާޅުކުރަން ފަށައިފައެވެ. އިއްޔެ ބިލް ފާސްކުރިއިރު މަޖިލިސް ދޮށުގައިއާއި ރައީސް އޮފީސް ކައިރީގައި މުލިއާގެ ކައިރީގައި ވެސް ނޫސްވެރިން މުޒާހަރާކުރިއެވެ. އެ މުޒާހަރާތަކަށް ފުލުހުން ހުރަސްއަޅައި، ބައެއް ނޫސްވެރިން ހިފެހެއްޓުމަށް ފަހު ގާނޫނީ އިންޒާރު ދީފައިވެއެވެ.

މީޑިއާ ބިލުން ފާހަގަކުރެވޭ އިތުރު ބައެއް ކަންކަން

  • ކޮމިޝަނުން އަންގާ ކަމެއް އިސްލާހުނުކޮށްފި ނަމަ 5،000 އާއި 25،000 ރުފިޔާއާ ދެމެދުގެ ޖޫރިމަނާއެއް
  • ގާނޫނާ ހިލާފު ކަމެއް ކޮށްފިނަމަ 100،000 ރުފިޔާއިން ޖޫރިމަނާކުރެވޭނެ
  • މައްސަލައެއް ބަލަން ފަށައި ވަގުތީ ގޮތުން ރަޖިސްޓްރީ ބާތިލުކުރުމުގެ ބާރު ކޮމިޝަނަށް ލިބޭ
  • ކޯޓު މަރުހަލާ ނުނިމެނީސް، ނޫހުގެ ރަޖިސްޓްރީ ބާތިލުކުރެވޭނެ
  • ނޫސްތަކުގެ ވެބްސައިޓް ބްލޮކްކޮށް، ޓިވީ ބްރޯޑްކާސްޓް ހުއްޓުވުމުގެ ބާރު ކޮމިޝަނަށް
  • ކޮމިޝަން އުފެދުމުގެ އަހަރެއް ކުރިން ހިނގި ކަންކަން ވެސް ކޮމިޝަނަށް ބެލޭނެ

ރައީސް ޑރ. މުހައްމަދު މުއިއްޒު ވަނީ މީޑިއާ ކޮންޓްރޯލް ކުރަން ޝައުގެއް ނެތް ކަމަށާއި އެ މަނިކުފާނަށް ބާރުތައް ނުލިބޭ ގޮތަށް ބިލު ފާސްކުރަން ޕީއެންސީގެ މެންބަރުންނަށް އަންގަވާފައިވާ ކަމަށް މީގެ ކުރިން ވިދާޅުވެފައެވެ.

comment ކޮމެންޓް