ނޫސްވެރިން އުލުބައިންދަން ޖެހޭ ކަމަށް ވެރިކަން ކުރާ ޕީއެންސީގެ ޕީޖީ ލީޑަރު އިބްރާހީމް ފަލާހު ވިދާޅުވި މައްސަލައާ މެދު ކަންބޮޑުވާ ކަމަށާއި، ނަމަވެސް އެ މައްސަލަ ބެލުމަކީ ހިއުމަން ރައިޓްސް ކޮމިޝަން (އެޗްއާރްސީއެމް)ގެ އިހުތިސޯސްގެ ތެރޭގައި ހިމެނޭ ކަމެއް ނޫން ކަމަށް އެ ކޮމިޝަނުން މިއަދު ބުނެފިއެވެ.
އިއްޔެ މަޖިލިސް އިދާރާ ބޭރުގައި އެތައް ނޫސްވެރިންނެއް މުޒާހަރާކުރަމުން ދަނިކޮށް ޕީއެންސީގެ ސުޕަ މެޖޯރިޓީ އޮންނަ މަޖިލީހުން ވަނީ މީޑިއާތައް ކޮންޓްރޯލް ކުރާ ބިލު ބަލައިގެންފައެވެ. މިހާރު އެ ބިލުގެ މަސައްކަތް އޮތީ ކޮމިޓީ މަރުހަލާގައެވެ.
އިއްޔެ ދައުރުން ބޭރުން ބޭއްވި އެ ޖަލްސާގައި އެ ބިލަށް ބަހުސްކުރައްވައި، ރައީސް ޑރ. މުހައްމަދު މުއިއްޒުގެ އަރިސް ބޭފުޅެއް ކަމަށްވާ ފަލާހު ވިދާޅުވީ ނޫސްވެރިން ލާންވީ ޖަލަކަށް ނޫން ކަމަށާއި 'އުލުބައިދަންވީ' ކަމަށެވެ.
ރަދީފުގައި ބުނާ ގޮތުން، އުލުބޭންދުމަކީ އިހު ޒަމާނުގައި މީހުން މެރުމަށް ހަދާ ގޮތެކެވެ. އެގޮތުން، އުލު ބައިންދާއިރު، ތޫނުކޮށްފައި ހުންނަ ދަގަނޑު އުލެއްގައި މީހާ ބައިންދާ ކަމަށް ރަދީފުގައި ބުނެފައިވެއެވެ.

ޕީއެންސީގެ ޕީޖީ ލީޑަރުކަން ވެސް ކުރައްވާ، އިބްރާހިމް ފަލާހު -- ފޮޓޯޯ/ މަޖިލިސް
އެ ވާހަކައާ ގުޅިގެން ފަލާހަށް ވަނީ ގިނަ ބައެއްގެ ފާޑުކިޔުން އަމާޒުވެފައެވެ.
އެކަމާ ގުޅިގެން އެޗްއާރްސީއެމުން ބުނީ ގާނޫނުއަސާސީއާއި ގާނޫނުން އިމްތިޔާޒް ލިބިދީފައިވާ ފަރާތްތަކުގެ މައްސަލަ ބެލުމަކީ އެ ކޮމިޝަނުގެ އިހްތިސޯސްގެ ތެރޭގައި ހިމެނޭ ކަމެއް ނޫން ކަމަށެވެ. އެހެންނަމަވެސް، ރައްޔިތުންގެ މަޖިލީހުގެ ތަޅުމުގައި ވިޔަސް އެނޫންވެސް ތަންތަނުގައި ދެކެވޭ ވާހަކަތުގައި، އެއްވެސް މީހެއްގެ އިންސާނީ ކަރާމާތަށް އުނިކަން އަންނާނެ މޭރުމުން ވާހަކަ ދެއްކުމަކީ އެއްވެސް ފަރާތަކުން ކޮށްގެން ވާނެ ކަމެއް ނޫން ކަމަށް އެ ކޮމިޝަނުން ބުންޏެވެ.
ހަމައެއާއެކު މީޑިއާތަކަށް ނިސްބަތްކޮށް ފަލާހު ދެއްކެވި ވާހަކަތަކަކީ އެ ކޮމިޝަންގެ ކަންބޮޑުވުމެއް ކަމަށް އެޗްއާރްސީއެމްއިން ބުންޏެވެ. އަދި ޚާއްސަކޮށް އަނެކާއަށް އޭނާގެ ދިފާއުގައި އެއްޗެއް ބުނުމުގެ ފުރުސަތު ނޯންނަ ތަނެއްގައި އަމުދުން އެފަދަ ވާހަކައެއް ދެކެވިގެން ނުވާނެ ކަމަށް އެ ކޮމިޝަނުން ބުންޏެވެ.
އެޗްއާރްސީއެމުން ބުނި ގޮތުގައި މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ބިލަށް ކޮމެންޓް ކުރުމުގެ މަސައްކަތް ކޮމިޝަނުން މިވަގުތު ދަނީ ކުރިއަށް ގެންދަމުންނެވެ. އަދި މި މަސައްކަތް ނިމުމުން އެކަމާ ގުޅޭ އިތުރު މައުލޫމާތު ކޮމިޝަނުން ހިއްސާކުރާނެކަމަށް ވަނީ ބުނެފައެވެ.

ރައީސް އޮފީސް ސަރަހައްދުގައި މިނިސްޓަރު ޚަލީލާއި އަސްވާޑު ނޫސްވެރިންނާ ބައްދަލުކުރެއްވުން ---- ސަން ފޮޓޯ/ މާނިއު މުހައްމަދު
ސަރުކާރާ ގުޅުން ބޮޑު އަމިއްލަ މެންބަރެއް ކަމަށްވާ ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ބިލާ ދެކޮޅަށް ރައީސް އޮފީސް ސަރަހައްދުގައި މިއަދު ވެސް ނޫސްވެރިން ހިމޭން އިހުޖާޖުކުރަނިކޮށް، މި ސަރުކާރުގެ ޔޫތު އެމްޕަވަމަންޓް، އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑް)އާއި ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ޚަލީލް ވަނީ ނޫސްވެރިންނާ ބައްދަލުކުރައްވާފައެވެ.
ނޫސްވެރިން ވަނީ ފަލާހުގެ ވާހަކައާ ގުޅިގެން މިނިސްޓަރުން ދެކިވަޑައިގަންނަވަނީ ކިހިނެއްތޯ ސުވާލުކޮށްފައެވެ.
އެ ސުވާލަށް ޚަލީލް ވިދާޅުވީ، ޖަވާބު ދެއްވަން ބޭނުންފުޅުނުވާ ކަމަށެވެ. އަދި، އެއްވެސް ރައްޔިތަކާ ދިމާލަށް ބޭއިންސާފުން ވާހަކަދެއްކުމަކީ ގަބޫލުކުރައްވާ ކަމެއް ނޫން ކަމަށް ޚަލީލް ވިދާޅުވިއެވެ.
ފަލާހުގެ ވާހަކައަށް ތާއިދުކުރައްވަންތޯ އެހުމުން މިނިސްޓަރު އަސްވާޑު ވިދާޅުވީ، އެ ސުވާލަށް ޖަވާބު ދޭން ޕާޓީ ތެރެއިން ބޭފުޅުން ހަމަޖައްސާފައި ތިބޭނެ ކަމަށާއި އެ ވާހަކަދެއްކީ މިނިސްޓަރު ނޫން ކަމަށެވެ.
ފަލާހުގެ ވާހަކަ ނޫސްވެރިންނާއި ގިނަ ބަޔަކު ކުށްވެރިކުރަމުން އަންނައިރު، އެ ވާހަކަ ކުށްވެރިކުރި މި ސަރުކާރުގެ ސިޔާސީ މަގާމެއްގައި ހުންނެވި އިބްރާހިމް ސައީދު (ކޭޑް) މިއަދު ވަޒީފާއިން ވަނީ ވަކިކޮށްފައެވެ.
ފަލާހްގެ ވާހަކަތައް ކުށްވެރިކޮށް ފޭސްބުކްގައި ކުރި ޕޯސްޓެއްގައި ކޭޑް ވަނީ ފަލާހަށް ވަރަށް ބޮޑަށް ފާޑުވިދާޅުވެފައެވެ. އަދި، އެ މައްސަލަ ބަލަން ޖެހޭ ކަމަށް އޭނާގެ ޕޯސްޓުގައިވެއެވެ.
ހަމައެއާއެކު ބިލާ ގުޅިގެން އިއްޔެއާއި މިއަދު ނޫސްވެރިން ކުރި ޕްރެޝަރާ އެކު މިއަދު މެންދުރު ފަހު ރައީސް ޑރ. މުހައްމަދު މުއިއްޒު ނޫސްވެރިންނާ ބައްދަލުކުރައްވައިފައެވެ.

ރައީސް ޑރ. މުހައްމަދު މުއިއްޒާއި ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު -- ފޮޓޯ/ ރައީސް އޮފީސް
ހައްނާން ހުށަހެޅުއްވި ބިލުގައި އޮތީ ކީކޭ؟
- މޯލްޑިވްސް މިޑިއާ އެންޑް ބްރޯޑްކާސްޓިން ކޮމިޝަނެއް އުފެއްދުން.
- ކޮމިޝަންގައި ރައީސް އައްޔަންކުރައްވާ ތިން މެންބަރުން ތިއްބަވާނެ.
- ބާކީ ހަތަރު މެންބަރުން އިންތިޚާބުކުރާނީ މީޑިއާތަކުން.
- ކޮމިޝަންގެ ރައީސް އައްޔަންކުރައްވާނީ ރައީސް.
- ކޮމިޝަނުން އަންގާ ކަމެއް އިސްލާހުނުކޮށްފި ނަމަ 5،000 އާއި 25،000 ރުފިޔާއާ ދެމެދުގެ ޖޫރިމަނާއެއް.
- ގާނޫނާ ހިލާފު ކަމެއް ކޮށްފިނަމަ 100،000 ރުފިޔާއިން ޖޫރިމަނާކުރެވޭނެ.
- މައްސަލައެއް ބަލަން ފަށައި ވަގުތީ ގޮތުން ރަޖިސްޓްރީ ބާތިލުކުރުމުގެ ބާރު ކޮމިޝަނަށް ލިބޭ.
- ކޯޓު މަރުހަލާ ނުނިމެނީސް، ނޫހުގެ ރަޖިސްޓްރީ ބާތިލުކުރެވޭނެ.
- ނޫސްތަކުގެ ވެބްސައިޓް ބްލޮކްކޮށް، ޓިވީ ބްރޯޑްކާސްޓް ހުއްޓުވުމުގެ ބާރު ކޮމިޝަނަށް.
- ކޮމިޝަން އުފެދުމުގެ އަހަރެއް ކުރިން ހިނގި ކަންކަން ވެސް ކޮމިޝަނަށް ބެލޭނެ.
ރައީސް ވަނީ މީޑިއާ ކޮންޓްރޯލް ކުރަން ޝައުގެއް ނެތް ކަމަށާއި އެ މަނިކުފާނަށް ބާރުތައް ނުލިބޭ ގޮތަށް ބިލު ފާސްކުރަން ޕީއެންސީގެ މެންބަރުންނަށް އަންގަވާފައިވާ ކަމަށް މީގެ ކުރިން ވިދާޅުވެފައެވެ.