ސަރުކާރުން ފަސް އަޅައި ފޮރުވަން ޖެހޭ ކަންކަން ގިނަ ނޫން ނަމަ، މީޑިއާ ކޮންޓްރޯލްކޮށް ސަރުކާރުގެ މުށުތެރެއަށް މީޑިއާ ގެނައުމަށް އެއްވެސް މަސައްކަތެއް ނުކުރާނެ ކަމަށް، ކުރީގެ ރައީސް އަބްދުالله ޔާމީން އަބްދުލްޤައްޔޫމް މިރޭ ވިދާޅުވެއްޖެއެވެ.
ޕީއެންއެފްގެ އޮފީހުގައި މިރޭ ބޭއްވި ޖަލްސާގައި، ސަރުކާރާ ގުޅުން ބޮޑު، ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހެޅުއްވި މީޑިއާ ކޮންޓްރޯލް ބިލާ ގުޅޭގޮތުން ވާހަކަފުޅު ދައްކަވަމުން ޔާމީން ވިދާޅުވީ، ބިލާ ގުޅޭގޮތުން ރައީސް ޑރ. މުހައްމަދު މުއިއްޒު ނޫސްވެރިންނާ ބައްދަލުކުރެއްވީ ގޮތް ހުސްވެގެން ކަމަށެވެ.
ޔާމީން ވިދާޅުވީ، ނޫސްވެރިންނާ ބައްދަލުކުރެއްވުމަށް ފަހު، ރައީސް ނޫސްވެރިންގެ ކަންބޮޑުވުންތައް ފުރިހަމައަށް ބައްލަވައި އެކަންކަން ހައްލުކުރައްވަން ޖެހޭ ކަމަށެވެ.
އެއާއެކު، މީޑިއާތައް ކޮންޓްރޯލްކުރުމާއި، ކޮންޓްރޯލް ބިލުގެ ދަށުން އުފައްދާ ކޮމިޝަންގެ ބާރު ބޭނުންފުޅުނުވާ ކަން ރައީސް ވިދާޅުވި ވިދާޅުވުން ޔާމީން ފާހަގަކުރެއްވިއެވެ.
"ބޭނުންގޮތެއް ނޫނޭ ވިދާޅުވާއިރު މީގެ ޕެރަލަލްތައް އެބަހުރި، އިލެކްޝަން ކޮމިޝަންގެ ރައީސަކީ މުއިއްޒު އައްޔަންކުރާ މީހެއް، އޭސީސީގެ ރައީސަކީ މުއިއްޒު އައްޔަންކުރާ މީހެއް، ކުރީގަ އޮވެއްޖިއްޔާ މި އޮންނަނީ އެ މީހުންގެ ތެރެއިން ވޯޓު ލައިގެން ހޮވޭ މީހެއް، މި ހުރިހާ ތަނެއް މުއިއްޒު ކޮންޓްރޯލްކުރަނީ، އެކަމަކު މިހާރު މި ބުނަނީ މި ބިލުގަ އެބައޮތޭ މިހެން ވެސް، ތިމަންނަ ބޭނުމެއް ނޫނޭ އެކަމެއް،"ކުރީގެ ރައީސް އަބްދުالله ޔާމީން
މީޑިއާތައް ކޮންޓްރޯލްކުރަން ބޭނުންފުޅުނުވާ ކަމަށް ރައީސް ވިދާޅުވަމުން ގެންދެވި ނަމަވެސް، މުހިންމު މިނިވަން މުއައްސަސާތަކުގެ ވެރިން އައްޔަންކުރައްވަނީ ރައީސް ކަމަށާއި، އެ މުއައްސަސާތައް ހިންގުމުގެ ޒިންމާ އުފުލަނީ ވެސް އެ ބޭފުޅުން ކަމަށް ޔާމީން ވިދާޅުވިއެވެ. އެހެންކަމުން ރައީސްގެ އިޚުލާސްތެރިކަމެއް ނެތް ކަމަށް ޔާމީން ވިދާޅުވިއެވެ.

ކުރީގެ ރައީސް އަބްދުﷲ ޔާމީން: ޕީއެންއެފްގެ ވޭކްއަޕް ޖަލްސާ ތެރެއިން -- ސަން ފޮޓޯ/ މޫސާ ނަދީމް
ނޫސްވެރިން އުލުބައިންދަން ގޮވާލައްވައި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާހު ދެއްކެވި ވާހަކައަށް އިޝާރާތްކުރައްވައި ޔާމީން ވިދާޅުވީ، ސޯޝަލް މީޑިއާގައި މީހަކު މަރުގެ އިންޒާރުދީ ލިޔާ އެއްޗަކުން ޓެރަރިޒަމްގެ ދައުވާކޮށް ފުލުހުންގެ ތަހްގީގަށް މީހުން ހައްޔަރުކުރާ ކަމަށާއި، އެކަމަކު ފަލާހާ ސުވާލުނުކުރާ ކަމަށެވެ.
އެމަނިކުފާނު ވިދާޅުވީ، އިންސާނީ ކަރާމާތް ނަގާލުމަކީ ރަނގަޅުކަމެއް ނޫން ކަމަށެވެ.
"އެކަމަކު އަޅުގަނޑުމެން މި ދައްކަނީ އިންސާނީ ކަރާމާތުގަ ތިބޭ ވަކި ގިންތިއެއްގެ މީހުންގެ ވާހަކަ، އެއީ ޕަބްލިކް އޮފީސް ހޯލްޑްކުރާ މީހުންގެ ވާހަކަ، އެ މީހުން އެ ބުނާ ރީތި އިސްލާމީ ފޭލި އަނދެގެން ސާލު ލައިގެން ތިބޭ ކަމަށް ވަންޏާ މި ވާހަކައެއް ނުދައްކާނެ، ވައްކަންކުރީމަ މައްސަލަ ނުބަލާ ވާހަކަ، ގޯތި ހިތުހުރިހާ މީހަކަށް ދިނީމަ މައްސަލަ ނުބަލާ ވާހަކަ، ތަންތަނުން ލާރި ކަހާލީމާ މައްސަލަ ނުބަލާ ވާހަކަ، މި ހުންނަނީ އިސްލާމްދީނުގައި ހުންނަ ރީތި ސިފަތަކެއް ނޫނޭ،" ޔާމީން ވިދާޅުވިއެވެ.
"އެހެންވީމަ ރީތި ސިފަތައް ދޫކޮށްލާފަ، ރައްޔިތުންގެ މައްޗަށް މިހާ ބޮޑަށް އަނިޔާވެރިވީމާ އެ މީހުންނާ ދޭތެރޭގަ ޕަބްލިކް އޮފީސް ހޯލްޑްކުރާ މީހުންނާ ދޭތެރޭގައި އެ ތުހުމަތުކުރާނެ، އެއީކީ މީހެއްގެ އަބުރު ކަތިލުމެއް ނޫން،"ކުރީގެ ރައީސް އަބްދުالله ޔާމީން
ޔާމީން ވިދާޅުވީ، ސަރުކާރު ޖަވާބުދާރީކުރުވޭނެ ފަދަ މުއައްސަސާއެއް މިވަގުތު ނެތް ކަމަށާއި، އެހެންކަމުން ސަރުކާރު ޖަވާބުދާރީކުރުވަން މީޑިއާ އޮންނަން ޖެހޭ ކަމަށެވެ. އެމަނިކުފާނު ވިދާޅުވިގޮތުގައި، މިވަގުތު މިނިވަންކަމާއެކު އޮތް އެއް ބާރަކީ މީޑިއާކަމަށް ވާއިރު، މީޑިއާތައް ކޮންޓްރޯލްކުރަން ސަރުކާރުން މަސައްކަތްކުރަނީ ސަރުކާރުން ކުރާ ގޯސް ކަންކަމަށް ރައްޔިތުން ފާޑުކިޔާތީ އެ ފާޑުކިއުންތަކުގައި "މަތިއެޅުމުގެ" ގޮތުންނެވެ.
އެއާއެކު، ޔާމީން ވިދާޅުވީ، ސަރުކާރުގައި ތިއްބަވާ ވެރިންގެ ވާހަކަ ރައްޔިތުން ދައްކަނީ ވެރިންގެ ފަސްބައިގައި ކަންތައްތަކެއް ހުރުމުން ކަމަށެވެ.

ނޫސްވެރިން ރައީސް އޮފީސް ކުރިމަތީ އިހުތިޖާޖުކުރަނީ: މީޑިއާ ބިލާ ގުޅިގެން ރައީސް ވަނީ ނޫސްވެރިންނާ ބައްދަލުކުރައްވައިފައި -- ސަން ފޮޓޯ/ އަހުމަދު އިޔާދު
"މީޑިއާ މާ ރަނގަޅަށް ރެގިއުލޭޓްކުރަންޏާ އެކަން ދޫކޮށްލަންވީނޫންތޯ މީޑިއާއަށް،"
މީގެ އިތުރުން ޔާމީން ވިދާޅުވީ، ޖެހިގެން އުޅޭ މައްސަލައަކީ ސަރުކާރުން ހިންގާ ބޮޑެތި ޖަރީމާތަކުގެ އަޑު ކަނޑުވާލަން ޖެހޭ ޖެހުން ކަމަށެވެ. މީޑިއާ ކޮންޓްރޯލްކުރާ ބިލު ފާސްކުރަން ޖެހޭ ސަބަބާ މެދު ސުވާލު އުފައްދަވައި އެމަނިކުފާނު ވިދާޅުވިގޮތުގައި އާންމުންގެ ކަންކަމާ ހަވާލުވެ ތިބޭ މީހުން ގޯސް ހަދާ ގޯސްތަކުގެ ވާހަކަ އާންމުން އަބަދު ވެސް ދައްކާނެއެވެ.
"އެހެންވީމާ މި ބޭފުޅުން ފަސް އަޅައި ފޮރުވަން ބޭނުންވާ ކަންކަން ގިނައީ، އެހެެންނޫން ނަމަ މިހެނެއް އުޅޭކަށް ނުޖެހޭ އިނގޭތޯ،" އެމަނިކުފާނު ވިދާޅުވިއެވެ.