މަސްތުވާތަކެތީގެ މައްސަލައެއްގައި ތައިލެންޑުގެ ޖަލެއްގައި ބަންދުކޮށްފައި ހުރި ދިވެހި ޒުވާނަކު މަރުވެއްޖެއެވެ.
ދިވެހި ފުލުހުންގެ މީޑިއާ އޮފިޝަލަކު މިއަދު ވިދާޅުވި ގޮތުގައި، ތައިލެންޑުގެ ޖަލެއްގައި ހުއްޓައި މަރުވެފައިވަނީ ތ. ގުރައިދޫ، ފަނާރު، އުމުރުން 22 އަހަރުގެ އިބްރާހީމް ނަބީހު ނަސީމްއެވެ.
އިބްރާހީމް ނަބީހު ނަސީމް ތައިލެންޑުގެ ފުލުހުންގެ ބެލުމުގެ ދަށަށް ގެންގޮސްފައިވަނީ މިދިޔަ ފެބްރުއަރީ މަހުގެ 22 ވަނަ ދުވަހުއެވެ. އޭނާ ހައްޔަރުކޮށްފައިވަނީ ތައިލެންޑުގެ ޑޮން މުއަންގް އިންޓަނޭޝަނަލް އެއާޕޯޓުންނެވެ.
ނަމަވެސް އޭނާގެ މައްޗަށް ތުހުމަތުކުރެވޭ މަސްތުވާތަކެތީގެ މައްސަލައިގެ އިތުރު ތަފުސީލެއް އަދި އޭނާ މަރުވާން މެދުވެރިވި ސީދާ ސަބަބެއް ފުލުހުން އަދި ހާމަކޮށްފައެއް ނުވެއެވެ.
މި ހާދިސާއާ ގުޅިގެން ބަލަންޖެހޭ ކަންކަން ދިވެހި ފުލުހުން މިހާރު ދަނީ ކަމާބެހޭ އިދާރާތަކާ ގުޅިގެން ބަލަމުން ކަމަށް އޮފިޝަލް ވިދާޅުވިއެވެ.