އަހަރުގެ ފުރަތަމަ ހަތަރު މަސް ދުވަހުގެ ތެރޭގައި ފަތުރުވެރިކަމުގެ ބިމު ކުލީގެ ގޮތުގައި ދައުލަތަށް 714 މިލިޔަން ރުފިޔާ ލިބިފައިވާ ކަމަށް ދައުލަތުގެ ޓެކްސް އިދާރާ (މީރާ)ގެ ތަފާސްހިސާބުތަކުން ދައްކައިފިއެވެ.
މިއީ މިދިޔަ އަހަރުގެ މި މުއްދަތާ އަޅާބަލާއިރު 22.6 އިންސައްތައިގެ ބޮޑު ކުރިއެރުމެކެވެ. މީރާއިން ހާމަކޮށްފައިވާ ގޮތުގައި، މިދިޔަ އަހަރުގެ ފުރަތަމަ ހަތަރު މަހު ބިމު ކުލީގެ ގޮތުގައި ލިބިފައިވަނީ 582 މިލިޔަން ރުފިޔާއެވެ. މިއަހަރުގެ މިހާތަނަށް އެންމެ ގިނަ އާމްދަނީއެއް ލިބިފައި ވަނީ މާރިޗު މަހުގެ ތެރޭގައެވެ. އެގޮތުން:
- ޖަނަވަރީ: 90 މިލިޔަން ރުފިޔާ
- ފެބުރުއަރީ: 18.7 މިލިޔަން ރުފިޔާ
- މާރިޗު: 440 މިލިޔަން ރުފިޔާ
- އޭޕްރީލް: 128 މިލިޔަން ރުފިޔާ
ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކަށް ބަލާއިރު، ރާއްޖެއަށް އަންނަ ފަތުރުވެރިންގެ ބޮޑު އިންސައްތައެއް ދަނީ ރިސޯޓުތަކަށެވެ. ރާއްޖޭގައި މިވަގުތު އޮޕަރޭޓްކުރާ ޓޫރިސްޓް ފެސިލިޓީތަކުގެ އަދަދު ވަނީ 67,302 އެނދަށް އިތުރުވެފައެވެ. އޭގެ ތެރޭގައި ހިމެނެނީ:
- ރިސޯޓުތައް: 179 ރިސޯޓެއްގައި 44,977 އެނދު
- ގެސްޓްހައުސް: 918 ތަނެއްގައި 16,190 އެނދު
- ސަފާރީ އުޅަނދު: 171 އުޅަނދެއްގައި 3,481 އެނދު
- ހޮޓާ: 16 ހޮޓަލެއްގައި 2,654 އެނދު
ފާހަގަކޮށްލެވޭ ގޮތުގައި މެދުއިރުމަތީގައި ކުރިއަށްދާ ހަނގުރާމައިގެ ސަބަބުން ފަތުރުވެރިން އަންނަ މިންވަރު ދަށްވާން ފެށީ މިދިޔަ ފެބްރުއަރީ 28 އިން ފެށިގެންނެވެ. ރާއްޖެއަށް އެންމެ ގިނައިން ފަތުރުވެރިން އަންނަނީ އެ ސަރަހައްދުގެ ރޫޓުތަކުން ކަމަށްވާއިރު، އޭރުން ފެށިގެން ފަތުރުވެރިންގެ އަދަދުތައް އަންނަނީ މަދުވަމުންނެވެ.
އެކަމުގެ ސަބަބުން ފަތުރުވެރިކަމުގެ ދާއިރާއަށް 500 މިލިއަން ޑޮލަރުގެ ގެއްލުންވެފައިވާ ކަމަށް ސިނާއަތުގެ އިސް ޖަމާއަތްތަކުން ވަނީ ބުނެފައެވެ. އެ ފަރާތްތަކުން ވަނީ ގެއްލުމުން އަރައިގަންނަން ދިވެހި ސަރުކާރުގެ އެހީތެރިކަމަށް އެދިފައެވެ.